Iordanııanyń Amman qalasynda bokstan jasóspirimder arasyndaǵy Azııa birinshiligi jalǵasýda. Jartylaı fınal jekpe-jekteriniń qorytyndysy boıynsha bes qazaqstandyq boksshy qyz fınalǵa joldama aldy.
Ulttyq Olımpıada komıtetiniń málimeti boıynsha, 50 kıloda judyryqtasatyn otandasymyz Karına Toqybaı, Uldana Taýbaı (60 kılo), Nursulý Súıenáli (63 kılo), Arýjan Janǵabaeva (66 kılo) jáne Quralaı Eginbaıqyzy (80 kılo) jartylaı fınal kezdesýlerinde jeńiske jetip, sary qurlyq birinshiliginiń fınalyna joldama aldy.
О́kinishke qaraı, jartylaı fınalda Dıana Eleýsiz (46 kılo) ózbekstandyq Jasmı Tohırovadan, Gaýhar Zarden (48 kılo), Shahnaz Taıyrjanova (52 kılo), Aısha Sarıeva (54 kılo) úndistandyq sportshylarǵa ese jiberdi. 57 kılodaǵy jerlesimiz Anar Sálimbaı ıordanııalyq Aıa Sývındehtten, aýyr salmaqtaǵy Arýjan Zeınollaeva ózbek qyzy Sobırahan Shahobıdınovadan jeńilip qaldy.
Osylaısha, bes boksshy qyzymyz Azııa chempıonatynyń fınalynda judyryqtasady.