Kórnekti memleket jáne qoǵam qaıratkeri Dinmuhamed Qonaevtyń týǵanyna 110 jyl tolýyna oraı Talas aýdanynyń ortalyǵy Qarataý qalasynda ǵylymı-praktıkalyq konferensııa ótti.
Atalǵan shara qaıratkerdiń ómiri men shyǵarmashylyǵyna arnaldy. Konferensııaǵa Jambyl oblysy ákiminiń orynbasary Dáýlet Káribek, D.Qonaev atyndaǵy Halyqaralyq qordyń vıse-prezıdenti Bolat Baıbol, oblystyq «Qonaev qorynyń» tóraǵasy Álimbek Jumabaev, Talas aýdanynyń ákimi Qanatbek Mádibek jáne ardagerler men zııaly qaýym ókilderi qatysty.
Jıynda jazýshy, Qazaqstannyń eńbek sińirgen qaıratkeri Kósemáli Sáttibaıuly, fılologııa ǵylymdarynyń doktory, professorlar Sámen Qulbaraq, Merýert Kópbaeva, tarıh ǵylymdarynyń kandıdaty, dosent Ermek Serikbaev jáne Talas aýdandyq bıler keńesiniń tóraǵasy Sáýlembaı Ábsadyquly baıandama jasap, D.Qonaevtyń jalpy ómir jolyndaǵy ónegeli isteri men el úshin sińirgen eńbegin atap ótti. Sondaı-aq D.Qonaev atyndaǵy Halyqaralyq qordyń vıse-prezıdenti Bolat Baıbol qaıratkerdiń ónegeli ómirin jastarǵa úlgi etý, nasıhattaý qajettiligin aıtsa, oblys ákiminiń orynbasary Dáýlet Káribek el ekonomıkasy men mədenıetin damytý jolynda aıanbaı eńbek etkenin jetkizdi. Konferensııa sońynda birqatar azamattar Dinmuhamed Qonaevtyń 110 jyldyq merekelik medalimen marapattaldy.
Budan keıin Qarataý qalasynyń ortalyǵynan Dinmuhamed Qonaev atyndaǵy mýzeı ashyldy. Nysan zamanaýı úlgide salynǵan. Munda kórnekti tulǵanyń ózi paıdalanǵan birqatar zattarymen qatar, qaıratkerdiń ómir jolynan syr shertetin fotosýretter, kitaptar jáne ózge de qujattar qoıylǵan. Nysannyń jalpy aýdany 216 sharshy metrdi quraıdy. Ǵımarat úsh bólmeden turady. Atalǵan murajaıdyń lentasyn oblys ákiminiń orynbasary Dáýlet Káribek, D.Qonaev atyndaǵy halyqaralyq qordyń vıse-prezıdenti Bolat Baıbol men oblystyq «Qonaev qorynyń» tóraǵasy Álimbek Jumabaev qıdy. Sondaı-aq mýzeıdiń ashylý saltanatyna arnaıy kelgen Bolat Baıbol Dinmuhamed Ahmetulynyń kıimderin, chemodany men qoldanǵan ydys-aıaqtaryn jáne kórnekti tulǵanyń jazǵan kitaptaryn murajaıǵa tartý etti.
Jambyl oblysy