Teńgeniń aıyrbas baǵamynyń ózgerýine baılanysty qymbatshylyq bolady dep aýyl dúrligip qalǵan edi. Biz oblys ortalyǵynan óte shalǵaıda, 600 shaqyrym bolatyn Jangeldın aýdanynda turamyz. Jerdiń shalǵaılyǵyna baılanysty kúndelikti qoldanystaǵy taýarlar oblys ortalyǵynan bizge jetkenge deıin taǵy da qymbattaı túsetinin nesine jasyramyz? Jol, kólik shyǵyny eseptelgendikten biz muny da túsinemiz. Osyny oılap, teńge baǵamy ózgergen kezde ábirjip qalǵanymyz ras edi.
Elbasy Nursultan Nazarbaev Úkimettiń keńeıtilgen otyrysynda 1 sáýirden bastap azamattyq qyzmetshilerdiń jalaqysyna 10 paıyzdyq tólem qosýdy tapsyrǵan edi. Azamattyq qyzmetshilerge biz, ustazdar da jatamyz. Aılyq jalaqymyzdyń 10 paıyzy biz úshin ájeptáýir aqsha. Qymbatshylyqtan qaımyǵyp, qalaı bolar eken dep otyrǵanda Elbasynyń bul sheshimi kóńilimizdi ornyna túsirdi. Aldaǵy kúnge senimimiz artty.
Biz aýyl muǵalimderi kúni boıy mektepte balalarmen birge bolamyz. Jas urpaqqa sapaly bilim berý bir kún de bosańsýdy kótermeıdi. Ár muǵalimniń otbasy, bala-shaǵasy bar. Sondyqtan olardyń kúnkórisi, turmys deńgeıi mekteptegi qyzmetine áser etedi. Aılyq jalaqyǵa qosylǵan 10 paıyz aqsha árkimniń turmysyna jaqsy áser etedi. Elbasynyń tapsyrmasyn ýaqtyly oryndap, dárigerlerge, muǵalimderge jáne mádenıet pen áleýmettik qorǵaý salalarynyń qyzmetkerlerine qoldaý jasaǵan Úkimetke de rızashylyǵymdy aıtar edim. Ustazdarǵa jasalǵan mundaı qamqorlyq bilim salasynyń jumysyn jaqsartýǵa degen ıgi qadam desem artyq pa? Kóńili toq ustaz óziniń súıikti isine de yntamen kirisetini maǵan tanys kórinis.
Azyq-túliktiń de asa qymbattap jatqanyn baıqap otyrǵan joqpyz. Elimiz basshylyǵynyń osyndaı qamqorlyǵyn sezingen biz arqamyzdy úıge súıegendeımiz. Myń da bir shúkir. Rahmet!
Roza QAPANOVA,
Jangeldın aýdanyndaǵy Y.Altynsarın
atyndaǵy orta mekteptiń muǵalimi.
Qostanaı oblysy.