Áleýmettik toptar arasyndaǵy qarym-qatynastardy qoldaý jáne jalpy elorda turǵyndarynyń ál-aýqaty men ómir súrý deńgeıin arttyrý maqsatynda 2019 jyly Nur-Sultan ákimdigi janynan «Januıa» otbasy ınstıtýtyn qoldaý ortalyǵy ashyldy. Mekeme dırektory Ásemgúl Sadyr onlaın brıfıngte osy ýaqyt ishinde atqarylǵan jumystar týraly jáne ortalyqtyń azamattarǵa mańyzdy áleýmettik máselelerdi sheshýge qalaı kómektesetini týraly aıtyp berdi.
Ortalyq azamattardyń jekelegen sanattaryna, onyń ishinde kópbalaly, tolyq emes jáne áleýmettik az qamtylǵan otbasylarǵa, múmkindikteri shekteýli balalardy tárbıelep otyrǵan ata-analarǵa jáne t.b. «bir tereze» qaǵıdaty boıynsha konsýltasııalyq qyzmetter keshenin usynady. Onda otbasynyń áleýmettik problemalaryn keshendi sheshý júzege asyrylady. Atap aıtqanda, áleýmettik qoldaýdy qajet etetin otbasylar anyqtalady, ómirlik qıyn jaǵdaıdyń sebepteri anyqtalady, ony jeńýge kómek kórsetiledi, áleýmettik qorǵaýdyń ártúrli máseleleri boıynsha keńester beriledi jáne t.b.
«Otbasynyń áleýmettik máselelerin sheshýdegi keshendi tásil «Januıa» ortalyǵynyń bazasynda memlekettik jáne kvazımemlekettik sektor mekemeleriniń qyzmetin uıymdastyrý arqyly júzege asyrylady. Qala turǵyndary men memlekettik organdar arasyndaǵy Biryńǵaı dıalog alańynda «bir tereze» qaǵıdaty boıynsha 7 memlekettik organ men kvazımemlekettik mekemelerdiń 15 qyzmeti biriktirilgen. Olardyń qatarynda – bilim basqarmasy, qoǵamdyq densaýlyq saqtaý basqarmasy, halyqty jumyspen qamtý ortalyǵy, turǵyn úı jáne turǵyn úı ınspeksııasy basqarmasy, «Otbasy banki» bar», dep atap ótti Ásemgúl Sadyr.
Ortalyq mamandary ómirlik qıyn jaǵdaıda júrgen árbir otbasyǵa jeke kóńil bóledi. 2021 jyly 432 otbasy tekserilip, 289 otbasy áleýmettik súıemeldeý jumysyna qabyldandy. Sonymen qatar ortalyqta zańgerlerden, psıhologterden keńes alýǵa bolady, sol sııaqty ómirlik qıyn jaǵdaıǵa tap bolǵan otbasylarǵa áleýmettik qoldaý kórsetiledi. Analıtıkalyq málimetterge sáıkes, ashylǵan kúninen bastap – 2019 jyldan beri ortalyqqa psıhologııalyq kómek alý úshin 798, zańgerlik kómek úshin 5 090 adam júgingen, 1 800-den astam azamatqa áleýmettik kómek kórsetilgen.
«Januıa» ortalyǵynda sıfrly saýattylyqty arttyrý jáne áleýmettik qyzmetter portaly arqyly ózine qyzmet kórsetý múmkindigin jasaý maqsatynda áleýmettik az qamtylǵan, kópbalaly otbasylar, múmkindigi shekteýli balalardy tárbıelep otyrǵan adamdar úshin ózine-ózi qyzmet kórsetý sektory uıymdastyryldy. Portal qyzmetteri boıynsha 18 myńnan astam ótinishke qyzmet kórsetildi.
«Ashylǵan kúnnen bastap ortalyqqa barlyǵy 114 921 suraq boıynsha 110 266 adam júgindi. «Halyq únine qulaq asatyn memleket» tujyrymdamasyn júzege asyrý, áleýmettik shıelenisti azaıtý, jergilikti atqarýshy organdar arqyly memlekettik apparat qyzmetiniń tıimdiligin arttyrý maqsatynda, jalpy, ortalyq bazasynda bekitilgen keste boıynsha sanıtarlyq normalardy saqtaı otyryp, apta saıyn birinshi basshylar, memlekettik mekemeler basshylarynyń orynbasarlary, qalalyq máslıhat depýtattary azamattardy qabyldady», dedi ortalyq dırektory.