Qazaqstannyń birinshi, álemniń 20-raketkasy Elena Rybakına Indıan-Ýellste (AQSh) ótip jatqan WTA 1000 týrnıriniń úshinshi kezeńine joldama aldy.
Jarystyń (júlde qory – 8,4 mln AQSh dollary) 17-raketkasy bolyp tirkelgen qazaqstandyq tennısshi dodany ekinshi aınalymnan bastap, dúnıejúzilik reıtıngte 58-orynda turǵan belgııalyq Elıson Van Eıtvankpen kezdesti. E.Rybakına bir jarym saǵatqa sozylǵan matchta qarsylasynan 6:1, 7:5 esebimen basym tústi. Qazaqstandyq tennısshi 3 eıs jasap, 8 breık-poınttyń úsheýin paıdalandy. Rybakına úshinshi aınalymda álemniń 15-raketkasy, osy týrnırdiń ótken jylǵy fınalısi, Belarýs ókili Vıktorııa Azarenkomen sheberlik baıqasady.
Taǵy bir qazaqstandyq tennısshi, álemniń 47-raketkasy Iýlııa Pýtınseva ekinshi aınalymda tartysty básekede reıtıngte 51-oryndaǵy shveısarııalyq Vıktorııa Golýbıchten utylyp qaldy – 3:6, 6:2, 4:6.