О́tken aptanyń beısenbi jáne juma kúnderi elimizdiń alty qalasynda fýtboldan Qazaqstan chempıonatynyń ekinshi týr oıyndary ótti.
Birinshi týrda elordada «Astanamen» teń oınaǵan Qaraǵandynyń «Shahteri» bul týrda syrt alańda «Qyzyljardan» 1:0 esebimen basym tústi. Alǵashqy týrda elordalyq komanda alańǵa Qazaqstan fýtbol mektebiniń túlegi bolyp sanalmaıtyn jeti fýtbolshyny shyǵarǵany úshin Baqylaý-tártiptik komıteti «Astanaǵa» 0:3 esebimen tehnıkalyq jeńilis jazyp, «Shahterge» úsh upaı berdi. Osylaısha «Shahter» týrnır kestesinde alty upaımen kósh bastady. Al «Astana» ekinshi týrda kútpegen jerde chempıonattyń debıýtanty «Aqsýdan» 1:0 esebimen jeńilip, týrnır kestesinde sońǵy orynǵa túsip qaldy.
О́tken týrda óz alańynda «Aqtóbeni» 2:0 esebimen tize búktirgen Almatynyń «Qaıraty» bul týrda da jeńiske jetti. Túrkistanda «Maqtaaralmen» kezdesken almatylyqtar Hose Kanteniń penaltıden soqqan jalǵyz golynyń arqasynda úsh upaı oljalady. Byltyrǵy el chempıondary «Tobyl» ekinshi týrda «Kaspıımen» upaı bólisýge májbúr boldy. Aqtaýdaǵy match 0:0 esebimen aıaqtaldy.
Sonymen qatar ekinshi týrda «Aqtóbe» óz alańynda «Atyraýdy» (2:1) jeńse, «Taraz» «Ordabasy» klýbyn 1:0 esebimen utty. Oraldaǵy aýa raıynyń qolaısyzdyǵyna baılanysty «Aqjaıyq» – «Turan» kezdesýi keıinge shegerildi. Úshinshi týr matchtary 16 jáne 17 naýryz kúnderine josparlanǵan.