QR Aýyl sharýashylyǵy mınıstrligi ishki naryqtyń azyq-túlik taýarlarymen qamtamasyz etilýine apta saıyn monıtorıng júrgizedi. QR Aýyl sharýashylyǵy vıse-mınıstri Jeńis О́serbaı áleýmettik mańyzy bar azyq-túlik qorlary jaıynda esep berdi, dep habarlaıdy Egemen.kz.
Respýblıka boıynsha barlyǵy 1,3 mln tonna áleýmettik mańyzy bar taýarlar bar, onyń ishinde un - 144 myń tonna, qant - 90 myń tonna, kúrish - 39,3 myń tonna, makaron - 21 myń tonna jáne 900 myń tonna kókónis ónimderi bar.
«Aıta ketsek, azyq-túlik qory kún saıyn jańartylyp, qajet bolǵan jaǵdaıda tolyqtyrylyp otyrady. Sondaı-aq, elimizde jarma, un jáne basqa da taýarlar óndirý úshin shıkizat jetkilikti, oǵan qosa, et jáne sút ónimderin óndirý úshin aýyl sharýashylyǵy janýarlarynyń mal basy jetkilikti ekenin atap ótken jón. Azyq-túlik taýarlarynyń barlyq túrleri boıynsha halyqtyń qajettiligi óz óndirisi esebinen qamtamasyz etiledi, al keıbir óndiris qajettilikten edáýir asyp túsedi», dedi Jeńis О́serbaı Ortalyq kommýnıkasııalar qyzmetinde ótken baspasóz máslıhatynda.
Kúnbaǵys maıyna keletin bolsaq, respýblıkada óńdeýge jiberiletin 650 myń tonna kúnbaǵys bar. Aımaqtardaǵy kúnbaǵys maıynyń qory 30 myń tonnany quraıdy.
Vıse-mınıstrdiń aıtýynsha, ishki naryq kúnbaǵys maıymen jáne ony óndirý úshin shıkizatpen tolyq qamtamasyz etilgen. Kókónis daqyldary men kartoptyń qorlary naryqqa erte pisetin kókónister kirmes buryn halyqtyń qajettiligin qamtamasyz etý úshin jetkilikti. Sonymen qatar, qazirgi ýaqytta maıdyń, kúnbaǵys tuqymdarynyń jáne kartoptyń eksportyna shekteý bar.