Qazaqstannyń birinshi, álemniń 33-raketkasy Aleksandr Býblık Indıan-Ýellste (AQSh) ótip jatqan Masters týrnıriniń úshinshi aınalymyna shyqty.
Júlde qory 8,5 mln AQSh dollarynan asatyn jarystyń 31-raketkasy retinde tirkelgen A.Býblık dodany ekinshi aınalymnan bastady. Jerlesimiz bul kezeńde kezinde álemdik reıtıngte biraz ýaqyt kósh bastaǵan, «Úlken dýlyǵa» týrnırleriniń úsh dúrkin jeńimpazy (2012, 2013, 2016), eki márte Olımpıada chempıony (2012, 2016) ulybrıtanııalyq Endı Marreımen sheberlik baıqasty. Eki saǵatqa jýyq sozylǵan tartysty básekede qazaqstandyq tennısshi qazirgi kezde dúnıejúzilik reıtıngte 88-orynda turǵan ataqty qarsylasyn 7:6 (11:9), 6:3 esebimen tize búktirdi. Aleksandr match barysynda 11 eıs jasap, 5 breık-poınttyń bireýin paıdalandy. E.Marreı 4 eıspen shekteldi.
Buǵan deıin eki tennısshi kortta eki márte kezdesip, ekeýinde de Endı Marreıdiń mereıi ústem bolǵan edi. Al úshinshi matchta otandasymyz myqtylyq tanytty. Býblık úshinshi aınalymda álemniń 35-raketkasy bolgarııalyq Grıgor Dımıtrovpen kezdesedi.