QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda elimizdiń 2022 jylǵy qańtar-aqpandaǵy áleýmettik-ekonomıkalyq damý jáne respýblıkalyq bıýdjettiń atqarylý qorytyndylary qaraldy, dep habarlaıdy Egemen.kz QR Premer-Mınıstriniń baspasóz qyzmetine silteme jasap.
QR ulttyq ekonomıka mınıstri Álibek Qýantyrov, QR Ulttyq bankiniń tóraǵasy Ǵalymjan Pirmatov, qarjy mınıstri Erulan Jamaýbaev baıandama jasady.
Qazaqstanda bıylǵy eki aıdyń qorytyndysy boıynsha JIО́ ósimi 3,5%-ǵa deıin jedeldedi. Naqty sektor ekonomıkanyń turaqty ósý draıverine aınaldy.
«О́nerkásip óndirisiniń kólemi 4,7%, onyń ishinde óńdeý ónerkásibinde 3,9% artty. Farmasevtıkada 17%, kıim óndirisinde 12,8%, mashına jasaýda 9,2%, onyń ishinde lokomotıvter men vagondar óndirisinde 23,8%, avtomobıl jasaýda 10,2%, plastmassa buıymdary óndirisinde 8,7%, daıyn metall buıymdary óndirisinde 4,4%, qurylys materıaldary óndirisinde 2,1% ósim baıqalady», dedi Á. Smaıylov.
Taý-ken ónerkásibinde munaı óndirýdiń 9,2%-ǵa, tabıǵı gazdyń 8,9%-ǵa jáne metall kenderiniń 1,2%-ǵa ulǵaıýy esebinen 6,4%-ǵa senimdi ósim baıqalady.
Qyzmet kórsetý sektorynda kóliktegi (10,4%), saýdadaǵy (6,1%) jáne baılanys salasyndaǵy (5,1%) joǵary dınamıka esebinen 2,1% deńgeıinde oń ósim tirkelgen.
Qurylys salasynda ósim 7,6% deńgeıinde baıqalady jáne 1,8 mln sharshy metr turǵyn úı paıdalanýǵa berildi.
QR Premer-Mınıstriniń aıtýynsha, ekonomıkanyń shıkizattyq emes sektorlaryndaǵy turaqty ınvestısııalyq belsendilik jedel ekonomıkalyq ósimniń negizgi faktoryna aınaldy.
Ken óndirý salasyn esepke almaǵanda, ınvestısııalar 5,7%-ǵa ósti.
Qańtar-aqpan aılarynyń qorytyndysy boıynsha Aqmola, Pavlodar oblystarynda jáne Nur-Sultan qalasynda barlyq negizgi makrokórsetkishter boıynsha ósim baıqalyp otyr. Eń tómen kórsetkishter Aqtóbe jáne Mańǵystaý oblystarynda tirkeldi.
Á. Smaıylov qazirgideı kúrdeli kezeńde ekonomıkanyń ósý qarqynyn saqtaı otyryp, ári qaraı jedeldetý – asa mańyzdy mindet ekenin atap ótti.
«Halyqtyń tabysyn arttyrý, jumys oryndaryn qurý jáne ekonomıkany ártaraptandyrý jumystaryn barynsha kúsheıtý qajet. Bul úshin Memleket basshysynyń tapsyrmasyna sáıkes Úkimet 2022 jylǵa arnalǵan Is-qımyl baǵdarlamasyn iske asyryp jatyr. Sondaı-aq Halyqtyń tabysyn arttyrý baǵdarlamasy ázirlendi. Memlekettik organdardyń birinshi basshylary men ákimderge osy is-sharalardyń sapaly jáne tıimdi oryndalýyn qatań baqylaýǵa alýdy tapsyramyn», dedi QR Premer-Mınıstri.
Sonymen qatar ákimder áleýmettik mańyzy bar azyq-túlik taýarlarynyń baǵasyn turaqtandyrýǵa erekshe kóńil bólýi tıis. Ol úshin qajetti quraldar bar.
Sondaı-aq naryqtaǵy qubylmaly jaǵdaıdy eskere otyryp, Ulttyq ekonomıka mınıstrligi múddeli memlekettik organdarmen jáne ákimdiktermen birge baqylaýdy kúsheıtip, ınflıasııany tejep, baǵalardy ustap turý úshin qosymsha is-sharalardy ázirleýi qajet.
Buǵan qosa, qazirgi jaǵdaıda iskerlik belsendilikti ári qaraı damytý úshin ındýstrııalandyrý jumystaryn tıimdi júrgizýdiń, ekonomıkaǵa, ásirese, shıkizattyq emes sektorǵa ishki jáne syrtqy ınvestısııalardy tartýdyń, sondaı-aq shaǵyn jáne orta bıznesti damytýdyń mańyzy zor.
«Indýstrııa, aýyl sharýashylyǵy, ulttyq ekonomıka mınıstrlikteri men ákimdikter bul jumysty aıryqsha baqylaýda ustaýy qajet», dep tapsyrdy Á. Smaıylov.
Aıta ketsek, qazirgi ýaqytta Úkimet janynda bıznes ókilderiniń qatysýymen Daǵdarysqa qarsy sharalar jónindegi jedel shtab jumys isteıdi. Onyń otyrystarynda týyndaǵan barlyq máseleler birlesip sheshiledi.