Bas shahardyń Beıbitshilik jáne kelisim saraıynda otandyq estrada ánshileriniń qatysýymen KSRO jáne Qazaqstannyń Halyq ártisi, Halyq Qaharmany Roza Baǵlanovanyń 100 jyldyq mereıtoıyna arnalǵan «Aınalaıyn, halqymnan erkeletken» atty saltanatty konsert ótti. Taǵylymdy keshke Altynbek Qorazbaev, Sulýshash Nurmaǵambetova bastaǵan qazaq óneriniń qaıratkerleri men talantty jas ónerpazdar qatysyp, áıgili ánshiniń rýhyna taǵzym etti.
– Roza Baǵlanova – ańyz adam, qazaq estradasynyń jaryq juldyzy, tuǵyry bıik tulǵa. Ol kisiniń án álemindegi júrip ótken ónegeli joly izinen erip kele jatqan jas ónerpazdar úshin ǵumyrlyq taǵylym. Búginde «Qazaqkonsert» uıymy uly ánshiniń esimimen atalady. Bul – qazaq ániniń ańyzyna kórsetilgen zor qurmet. Qazaq áni men talǵampaz tyńdarmany barda Roza Baǵlanovanyń esimi óshpek emes, halyq jadynda máńgi jasaıdy, dedi Qazaqstannyń halyq ártisi, kompozıtor Altynbek Qorazbaev.
Qazaq ónerinde qaıtalanbas iz qaldyrǵan tarıhı tulǵanyń mereıtoıyna arnalǵan keshte ańyz ánshiniń repertýaryndaǵy ánder jandy daýysta shyrqaldy. Esimi elge belgili ónerpazdarmen birge aıtýly konsertte Roza Baǵlanovanyń nemeresi Úrbıbi Baǵlanova da óner kórsetti.
Úrbıbi – Roza Baǵlanovanyń azan shaqyryp qoıǵan esimi. Uly tulǵanyń esimin ıelengen talantty qyz ájesiniń jolyn qýyp, ónerdegi óziniń qaıtalanbas jolyn qalyptastyrýdy maqsat etipti.
Roza Tájibaıqyzy – Halyq Qaharmany ataǵyna ıe bolǵan Qazaqstandaǵy jalǵyz ánshi. Ol ómiriniń 70 jylynan astamyn sahnada ótkizip, álemniń 50-den asa elinde bolyp 25 tilde án shyrqaǵan. Sóıtip, jarty ǵasyrdan astam ýaqyt boıy qazaq halqynyń dástúrli mádenıeti men óneriniń órkendep, álemge tanylýyna zor úles qosty.
Alyp saraıdy toltyrǵan talǵampaz tyńdarmannyń kóńil-kúıinen uly tulǵaǵa degen sheksiz qurmet lebi esedi. Kúmis kómeı ánshiniń tamasha ánderi halyqtyń ánshige degen saǵynyshyn údete túskendeı. Beıbitshilik jáne kelisim saraıyna jınalǵan ónersúıer qaýym ásem ánnen qýat alyp, rýhanı demalyp qaıtty.
Ánshi mereıtoıyna arnalǵan is-sharalar aldaǵy ýaqytta da júıeli jalǵasyn tabady. Atap aıtsaq, Mádenıet jáne sport mınıstrliginiń uıymdastyrýymen Qyzylorda, Almaty, Máskeý qalalarynda ánshiniń shyǵarmashylyǵyna arnalǵan mereıtoılyq konsertter jáne Nur-Sultan qalasynda Halyq qaharmany Roza Baǵlanova atyndaǵy Halyqaralyq vokaldyq konkýrs uıymdastyrylady dep josparlanýda. Sonymen qatar Roza Baǵlanovanyń 100 jyldyǵy IýNESKO-nyń Parıj qalasyndaǵy shtab páterinde atalyp ótedi.
Roza Baǵlanovanyń áni barda ol eshqashan ólmeıdi. Bulbul ánshiniń biregeı shyǵarmashylyǵy, ǵıbratty ǵumyry, qaıratkerlik qasıetteri óskeleń urpaqtyń jadynda máńgige saqtalady.