«Uzynsaryǵa saqtaǵan sybaǵam edi» dep Naǵıma jeńgeı jeńdi bilekteı qos qazy men bir ózi bir tabaq bolatyn telshikti, qyrtysy qalyń semiz jambasty, jaıa men omyrtqany kebejesinen sýyryp aldy.
Meıizdeı sap-sary bolyp saqtalypty. Jeńgeı aıtqan uzynsary týraly oqyǵanbyz, estigenbiz. Ony adam eken dep, uzyn, sary kisi eken dep uǵyp, kúlkige qalǵandar týraly da biletin edik. Darqan dalanyń danalyq dápterine jazylǵan dáıekti dástúrdiń biri. Tek jurttyń aýzynan estimegeli ne zaman. Men ǵana emes, as úıde otyrǵan áldeneshe adam tańyrqaı qaraǵan. Bilgenimizben, sýyrylyp sóılep, eski ádet jaıynda sóz qozǵaýdy artyqtaý sanaǵanbyz. Naǵıma jeńgeıdiń ózi qamyrdan qyl sýyrǵandaı etip eptilikpen sıpattap shyqty. Sóz arnasy jalpy jurtqa baǵyttalǵanymen, ishki máıegi áli de tańyrqap otyrǵan jas kelinine baǵyttalǵandaı.
– Ilki zamanda erteńin oılaıtyn qazaq bar dámdisi men maılysyn uzynsaryǵa saqtaǵan, – dedi jeńgeı, – uzynsarynyń maǵynasy bylaı, kóktem kelip, jaryqtyń ulǵaıýy barshaǵa jaqsy áserin tıgizedi. Tún qysqaryp, kún uzarmaq. Qystyń kúni el erte jatady, óıtkeni sharýa isteı qoıady deıtindeı emes, dala qarańǵy. Al qarbalas shaq kóktemde. Uzaq qystan qystyǵyp shyqqan sharýa adamynyń boıyndaǵy qajyr kemip, qaırat azaımaq. Ash ózek tus. Mine, sol kezde qunarly as ishken adam ár kúni jylǵa azyq bolatyn kóktemniń ár sátin tekke jibermeı, apyryp-japyryp jumys isteıdi. Bıylǵy uzynsaryda azyq-túliktiń keıbir túrleri qymbattap ketti. Qaıta soǵymnyń eki-úsh tabaǵyn saqtap qoıǵanym durys bolypty. Dúnıe dúrgilip turǵanda, jaǵdaı turaqtaǵansha talǵajaý qylýǵa ábden jetedi.
Átteń, burynǵynyń salt-dástúrin saqtaı bermeıtindigimiz qandaı ókinishti. Áıtpese, maqsat-muraty búgingi kúnge dóp kelip turǵan joq pa?!
Kókshetaý