Almaty qalasynda Memleket basshysynyń Joldaýynda aıtylǵan saıası reformalar baǵdarlamasyn qoldaý maqsatynda Amanat partııasy qalalyq fılıalynyń uıymdastyrýymen mıtıng ótti.
Shoqan Ýálıhanov atyndaǵy alańda ótken beıbit sherýge barlyq salanyń ókilderi qatysty. Olardyń ishinde partııa jáne qoǵam belsendilerinen bólek, Májilis depýtattary, kásipkerler, ǵylym men mádenıet salasynyń ókilderi, sportshylar, jastar jáne el erteńine beıjaı qaramaıtyn qala turǵyndary bar.
Mıtıngke qatysýshylar saıası júıeni keshendi jańǵyrtý baǵdarlamasyn qoldaıtyndaryn bildirip, arnaıy transparanttarmen keldi. Jınalǵandar aldynda sóz sóılegen Amanat partııasynyń atqarýshy hatshysy Ashat Oralov jańa syn-qaterler jaǵdaıynda bárimiz birigip, Táýelsizdigimizdi qorǵaý, ata-baba amanatyn keıingi urpaqqa tutas jetkizý basty paryz ekenin alǵa tartty. «Bizdiń baǵytymyz – aıqyn, maqsatymyz – ortaq. Biz – kózi ashyq, kókiregi oıaý azamattardy birlesip jumys isteýge shaqyramyz! Basqa partııalar bılikke jetýdi kózdese, biz eń áýeli Táýelsiz Qazaqstannyń múddesi úshin jumys isteımiz! Ardaqty aǵaıyn, Abaı atamyzdan qalǵan amanat sóz bar: «Birińdi qazaq, biriń dos, Kórmeseń istiń bári bos». Sondyqtan, kúshimizdiń birlikte ekenin kórsetip, Jańa Qazaqstandy birge quraıyq! Biz birgemiz!» dedi ol.
Beıbit mıtıngke qatysqan Ulttyq ǵylym akademııasynyń akademıgi, tarıh ǵylymdarynyń doktory, professor Hankeldi Ábjanov Amanat partııasyndaǵy oń ózgerister elimizde saıası modernızasııalaýdyń jańa kezeńi bastalǵanynyń bir kórinisi ekenin atap ótti. «Prezıdentimiz Qasym-Jomart Toqaevtyń reformalary men bastamalary elimizdiń Konstıtýsııasynda pash etilgen quqyqtyq memleket qurýǵa jol ashatynyna senim mol», dedi ǵalym.
«Meniń ultym – ýkraın, biraq júregim qazaq dep soǵady! Sebebi men osy elde týyp-óstim, bilim aldym, dostarymnyń barlyǵy derlik qazaqtar», degen Qazaqstan-Reseı medısınalyq ýnıversıtetiniń 2-kýrs stýdenti Arıana Belobjıskaıa jastardy eń aldymen memleket múddesi úshin qyzmet etýge shaqyrdy.
О́z kezeginde, Májilis depýtaty Erlan Saırov elimizdegi saıası reformalardyń ózektiligi men mańyzdylyǵyna toqtaldy. «Árbir qazaqstandyq daýys berý jáne saılaný quqyǵyn qoldana alýy tıis. Demokratııaǵa, pikirler plıýralızmine balama joq. Bul búginde birden-bir saıası progress jáne ulttyq túleý joly», dedi ol.
«Qazirgi tańda birlikke shaqyrý popýlızm emes, qajettilik». Bul – mıtıngte sóz alǵan depýtat Aıdos Sarymnyń pikiri. Májilismen barlyq qoǵamdyq-saıası kúshterdi áriptestikke, birge jumys isteýge, jańa Qazaqstandy birge qurýǵa úndedi.
Al Halyqaralyq «Qazaq tili» qoǵamynyń vıse-prezıdenti Maksım Rojın qazirgi tańda qazaq tilin meńgergen ózge etnos ókilderiniń, ásirese, jastardyń sany arta túskenin zor maqtanyshpen jetkizdi. «Meniń týǵan elim – Qazaqstan. Men, Táýelsiz elimizdi órkendetý jolynda partııalastarmen birge úles qosýǵa qashan da daıynmyn», dedi ol.
Sondaı-aq mıtıngte Májilis depýtattary Janarbek Áshimjan, Saıasat Nurbek, Dınara Zákıeva, qalalyq máslıhat hatshysy Stanıslav Kankýrov, jýrnalıst Sergeı Ponomarev, kásipker Larıon Lıan, kópbalaly ana Sana Jandaı, ánshi Ibragım Eskendir jáne basqalar sóz sóıledi.