Japonııada turatyn qazaqstandyqtar Naýryz merekesine oraı bas qosyp, Tokıo tórinde Ulystyń uly kúnin toılady. Bul týraly Japonııadaǵy qazaq qaýymdastyǵynyń ókili Ábdibek Qalıbekuly aıtyp berdi, dep habarlaıdy Egemen.kz.
Japonııada qazaq qaýymdastyǵy osydan bir jyl buryn qurylǵan bolatyn. Alaıda pandemııaǵa baılanysty jınalystar ótkizilmegen.
«Bıyl Ulystyń uly kúnine baılanysty tikeleı atsalysyp, Japonııadaǵy qazaqtardyń basyn qosaıyn degen oımen Tokıoda qazaqstandyqtardy jınadyq. 40 shaqty azamat boldy. Mońǵolııa, Qytaı qazaqtary da boldy. Pandemııaǵa qaramastan bári keldi. Dombyra shertildi, kúı oınaldy. Qazaqtyń kók baıraǵy Tokıoda aspanynda kóterildi. Orta Azııadaǵy baýyrlas memleketter, onyń ishinde qyrǵyzdar, ózbekter keldi. Sóıtip, kishigirim toı boldy. 30-ǵa jýyq jastar keldi. Jalpy jan-jaqtan 80 shaqty adam jınaldy. Onyń ishinde 95 paıyz qazaqtar boldy. Bárimiz bas qosyp, Ulystyń uly kúni - Naýryzdy toıladyq», dedi Ábdibek Qalıbekuly.
Ulystyń uly kúnine oraı ótkizilgen is-sharaǵa Japonııada oqıtyn jáne jumys isteıtin qazaqstandyqtar qatysty.
«Pandemııaǵa qaramastan, oılaǵannan da kóp adam jınaldy. Basty maqsat Japonııadaǵy qazaq qaýymdastyǵy atynan qazaqtardy bir jerge jınap, Naýryz merekesin toılaý boldy. Sol maqsat iske asyp, qýanyshymyz qoınymyzǵa syımaı otyr. Tokıoda alǵash ret Naýryz merekesin toıladyq», dep tolyqtyrdy ol.