Densaýlyq saqtaý júıesi sapasyna qatysty álemdik reıtıngte Qazaqstan 95 eldiń ishinde 58-orynnan kórindi, dep habarlaıdy Egemen.kz.
Energyprom sarapshylarynyń derekterine qaraǵanda, Qazaqstannyń álemdik reıtıngtegi ındeksi – 59,99. Bul jerde ındeks joǵary bolǵan saıyn densaýlyq saqtaý júıesi de jaqsy degen sóz.
Jalpy, densaýlyq saqtaý júıesi sapasynyń ındeksi medısıalyq qyzmetkerlerdi, qural-jabdyqtardy, qyzmet qunyn jáne basqa da kórsetkishterdi baǵalaý arqyly anyqtalady.
Reıtıngke sáıkes, Taıvan, Ońtústik Koreıa jáne Japonııanyń densaýlyq saqtaý júıesi eń úzdik dep tanyldy. Al eń nashar kórsetkish Venesýelada tirkelgen.
Reıtıngke qatysatyn TMD elderi arasynda Qazaqstannyń densaýlyq júıesi úzdik dep tanylǵan. Bul rette Reseı, Ýkraına, jáne Ázerbaıjannyń kórsetkishteri birshama tómen.
Osy jyldyń aqpanynda elimizde ambýatorlyq qyzmetterdiń baǵasy 1 aıda 1,8%-ǵa al 1 jylda 6,4%-ǵa qymbattady. Aılyq dınamıkada dárigerlerdiń qyzmeti 6,1%-ǵa, dárigerlerdiń alǵash qabyldaýy 2,1%-ǵa, medısınalyq zerthanalar men rentgen kabınetteriniń qyzmetteri 1,4%-ǵa, tis dárigerleriniń qyzmeti 0,6%-ǵa ósti.
Elimizde árbir 100 myń turǵynǵa 405 dárigerden, dálirek aıtsaq, 14 provızordan, 21 farmasevten, 323 dáriger-mamannan jáne 10 tis dárigerinen keledi. Elorda men Almaty qalasy jáne Qaraǵandy oblysy dárigerlermen birshama joǵary deńgeıde qamtylǵan. Al Aqmola, Almaty jáne Túrkistan oblystarynda dáriger jetispeýshiligi baıqalady.