QR Premer-Mınıstriniń orynbasary Eraly Toǵjanov medısına qyzmetkerleriniń jalaqysyn kóterý boıynsha júrgizilip jatqan jumystar jóninde aıtty, dep habarlaıdy Egemen.kz.
«Memleket basshysynyń 2020-2025 jyldarǵa arnalǵan Qazaqstan halqyna Joldaýyn iske asyrý aıasynda medısına qyzmetkerleriniń jalaqysyn kezeń-kezeńimen arttyrý kózdelgen. 2023 jylǵa qaraı medısına qyzmetkerleriniń jalaqysyn ekonomıkadaǵy ortasha jalaqyǵa qaraǵanda 2,5 esege deıin (561 myń teńgege deıin) kóterý josparlanýda», dep jazdy Eraly Toǵjanov depýtattyq saýalǵa bergen jaýabynda.
Ol 2021 jylǵy 5 qańtardan bastap «Halyq densaýlyǵy jáne densaýlyq saqtaý júıesi týraly» 2020 jylǵy 7 shildedegi Qazaqstan Respýblıkasynyń Kodeksine sáıkes biliktilik sanaty joıylǵanyn eske saldy.
«Bul rette, ótpeli erejeler sheńberinde biliktilik sanattaryn berý týraly qoldanystaǵy kýálikter boıynsha qosymsha aqylardy júzege asyrý jalǵasatyn bolady. Qazaqstan Respýblıkasy Eńbek kodeksiniń 10 jáne 107-baptaryna sáıkes jumyskerge jalaqy jumys berýshide qoldanylatyn, eńbek, ujymdyq sharttardyń talaptarynda jáne jumys berýshiniń aktilerinde aıqyndalǵan eńbekke aqy tóleý júıelerine sáıkes eńbek shartynda belgilenedi jáne jumyskerlerdiń múddeliligin arttyrýdy kúsheıtý úshin syılyqaqy berý júıeleri jáne eńbekti yntalandyrýdyń nasharlaı almaıtyn basqa da nysandary engizilýi múmkin belgilengen sharttarmen salystyrǵanda qyzmetkerlerdiń jaǵdaıyn nasharlatatyn normalardy qarastyrý kerek», dep túıindedi Premer-Mınıstrdiń orynbasary.