Sońǵy jyldary balalar densaýlyǵyna alańdaýshylyq basym. Kúrdeli patologııalardyń saldarynan balalar múgedektikke ushyraýda. Olardy emdeýdiń ózi bir mashaqat bolsa, bilim alýmen tolyqqandy qamtamasyz etý áleýmettenýdiń eń kúrdeli satysyna aınalyp otyr. Osyndaı qıyndyqtarǵa qaramastan, bilim salasynyń mamandary tyǵyryqtan shyǵýdyń zamanaýı múmkindikterin ıgerýge kúsh salýda. Bul baǵytta ınklıýzıvti bilim berýdiń nátıjeliligin atap ótýge bolady.
Jýyrda Abaı atyndaǵy QazUPÝ rektory Darhan Bilálov «Áleýmettik ınklıýzıvti baǵdarlamalar ortalyǵy» qoǵamdyq qorynyń ókilderimen kezdesip, ınklıýzıvti bilim berý kadrlaryn, pedagog-assıstent retinde tıýtorlardy daıarlaýdaǵy yntymaqtastyq máselelerin talqylaǵan bolatyn. Elimizde tıýtorlardyń kómegine muqtaj balalar sanynyń kóbeıip bara jatqanyna alańdaýshylyǵyn bildirgen D.Bilálov belgili bir bilim berý baǵdarlamalary boıynsha mamandanýǵa múmkindik beretin qosymsha kýrstar ótkizý, tıýtorlardy kásibı qaıta daıarlaý baǵdarlamasyn iske asyrý jáne olardyń jumysyn ádistemelik súıemeldeýdiń mańyzdylyǵyna toqtaldy.
«Árbir bala fızıkalyq, ıntellektýaldyq, áleýmettik, emosıonaldyq, tildik jáne basqa da erekshelikterine qaramastan, bilim alyp, bizdiń qamqorlyǵymyzdy alýy kerek», dedi D.Bilálov.
«Áleýmettik ınklıýzıvti baǵdarlamalar ortalyǵy» qoǵamdyq qorynyń prezıdenti Saltanat Mýrzalınova-Iаkovleva osy ortalyqtyń qyzmeti men pedagog-tıýtorlardy qaıta daıarlaý qajettiligine toqtalyp, bilikti kadrlar tapshylyǵyn atap ótti. Onyń aıtýynsha, ókinishke qaraı, elimizde tıýtorlardyń kómegine muqtaj balalar sany artyp keledi.
Almaty qalasy men elimizdiń bilim salasynyń naqty máselelerin sheshýge baǵyttalǵan ýnıversıtet baǵdarlamalary mekteptermen tyǵyz jumys isteý, qazirgi tańda suranysqa ıe kadrlardy qaıta daıarlaý, sondaı-aq jumys berýshilermen jáne «О́rleý» ortalyǵymen ózara baılanys ornatý, stýdentterdiń praktıkasyn ótkizý máselelerine baǵyttalyp otyr. Sonymen birge bilim alýǵa teń quqyqty qamtamasyz etý, múmkindigi shekteýli balalar úshin bilimniń qoljetimdiligin, oqytýdyń qolaıly baǵytyn tańdaýdy qamtamasyz etetin ınklıýzıvti bilim berýdi damytý men psıhologııalyq testileý quraldaryn qoldaný baǵytyndaǵy is-sharalardy jetildirý ýaqyt kúttirmeıdi.
Kezdesýge qatysýshylar osy mańyzdy saladaǵy yntymaqtastyqty nyǵaıtý jóninde pikir almasty.
ALMATY