Bilim jáne ǵylym mınıstrligi alǵash ret BILIM Hackathon 2022 IT baıqaýyn ótkizbek. Oǵan stýdentter men baǵdarlamashylar qatysa alady. Jeńimpazdar 1,5 mln teńge alady. Ekinshi orynnyń ıegerine 1 mln teńge, úshinshi oryn úshin 500 myń teńge beriledi.
IT saıys 26-27 naýryzda Astana IT University bazasynda oflaın formatta ótedi. Atalǵan baıqaý bilim men ǵylym salasynda jańa IT jobalardy jasaýǵa bastamashy bolý, sondaı-aq qazirgi jáne bolashaq IT-mamandardy yntalandyrý maqsatynda ótkiziledi.
Bilim jáne ǵylym vıse-mınıstri Aıbat Ilııasov: «Elimizde túrli IT jobalardy ázirleıtin daryndy jastar kóp. Olardy baıqaýǵa qatysýǵa shaqyramyz. Saıysqa ýnıversıtet jáne kolledj stýdentteri, eńbek etip júrgen baǵdarlamashylar da qatysa alady. Ár oqý ornynan bir komandaǵa qatysýǵa ruqsat etiledi. Baıqaýǵa qatysý úshin ótinimderdi monhackathon@gmail.com elektrondy poshtasyna jiberýge bolady. О́tinimge komandanyń ataýyn, qatysýshylardyń aty-jónin jáne uıymnyń ataýyn kórsetý qajet», dedi.
Saıysqa qatysýshylarǵa erkin taqyrypta da, berilgen taqyryp boıynsha da bilim berý salasyndaǵy sıfrly sheshimder boıynsha joba daıyndaý sekildi túrli tapsyrmalar beriledi. Júldeger stýdentter marapattardan bólek, jumysqa ornalasý múmkindigine ıe bolady. Qazylar alqasynyń quramyna belgili IT-kompanııalardyń ókilderi kiredi.