Tótenshe jaǵdaı qyzmetiniń mamandary óńirde qys boıy túsken qardyń ortasha qalyńdyǵy – 28 sm, al qar quramyndaǵy ylǵal mólsheri 87 mm ekenin aıtyp otyr. Buǵan deıingi jyldardaǵy qardyń qalyńdyǵy ári ketse 21 santımetrge baratyn. Sondyqtan kún jylynǵan saıyn, ásirese Arqalyq qalasynyń mańaıyndaǵy aýyldar men Amangeldi, Jangeldın, Naýyrzym, Qarasý jáne Sarykól aýdandarynda jaǵdaı qıyndap ketýi múmkin.
Búginge deıin sý tasqyny kezeńine daıyndyq barysynda oblystaǵy 6 iri jáne 50 shaǵyn eldi mekenniń aınalasyna bógetter ornatylyp, sý arnalaryn arshý jumystary júrgizildi. Alaıda Tótenshe jaǵdaı qyzmetkerleri 34 aýylǵa áli de qyzyl sýdan qaýip tónip turǵanyn aıtty. Qazir bul eldi mekender qutqarýshylardyń jiti baqylaýyna alynyp, qaýip deńgeıin anyqtaıtyn kúndelikti monıtorıng jumystary júrgizilýde.
Búginde qalalyq jáne aýdandyq ákimdikter 9 myń tonnadan astam ınertti materıaldar men 46 myńnyń ústinde qum qaptaryn daıyndap qoıǵan. Oǵan qosa 135 myń tonnadan astam janarmaı qory saqtaýly tur. Sý basyp qalýy yqtımal eldi mekenderge azyq-túlik jetkizý máselesi de aldyn ala pysyqtalyp, sheshilip qoıǵan.
Sý tasqynynan keletin qaýiptiń beti qaıtqansha oblysta tótenshe jaǵdaı qyzmeti men barlyq azamattyq qorǵanys qyzmetterdiń apatqa qarsy birlesken shtaby jumys isteıtin bolady.
– Búginge deıin sý basyp qalýy múmkin eldi mekenderdiń turǵyndaryn ýaqytsha ornalastyratyn 195 pýnkt anyqtaldy. Bul oryndarǵa shamamen 11 myńnan astam adamdy ornalastyrýǵa bolady. Oblys aýmaǵyn áýeden, ǵaryshtan barlaý jumystaryn júrgizý úshin arnaıy kelisimsharttar jasaldy. Sonymen qatar 20 bógetke, 3 qorǵanys valyna ınjenerlik jóndeý jumystary júrgizilip, uzyndyǵy 8 shaqyrym bolatyn aryqtardyń erneýi keńeıtilip, túbi tereńdetildi. Munyń syrtynda, uzyndyǵy 10 shaqyrymnan asatyn sý ótkizgish qurylǵylar men qalalyq káriz jelileri qoqystan tazartyldy, – dedi oblystyq TJD bastyǵy, azamattyq qorǵanys polkovnıgi B.Kárimov.
TJD bastyǵynyń aıtýynsha, qyzyl sýdyń astynda qalý qaýpi bar eldi mekenderdiń aýmaǵynan 630 myń tekshe metr qar shyǵarylǵan. Bul jumystar áli de qyzyp jatyr. Al jergilikti ákimdikter men TJ qyzmeti kóktemgi sý tasqyny kezeńindegi kóldeneń shyǵyndarǵa 629 mln teńge qarjy qarastyryp qoıǵan.
Oblysta kóktemgi sý tasqyny bola qalǵan jaǵdaıda qaýiptiń aldyn tosý jumystaryna 1 070 tehnıka, 272 motosorǵysh qurylǵy, 114 qaıyq jáne 2,5 myńnan astam adam jumyldyrylmaq.
Qazirdiń ózinde sý arnasyn ashý úshin 7 aýdannyń aýmaǵyndaǵy ózenderde muz jarý jumystary júrip jatyr. Seń qozǵalǵansha júretin mundaı sharalar tasqynnan tónetin qaýipti azaıtady. Mysaly, muz jarýmen aınalysatyn NIKSIT seriktestiginiń mamandary mereke kúnderi Naýyrzym aýdanyndaǵy Dámdi ózeni men Sholaqsaı aýylynyń mańyndaǵy bógette jarylys júrgizdi. Sondaı-aq jarýshylar jasaǵy Qarasý aýdany Qaramyrza aýylynyń mańyndaǵy Tintýir ózeni men Qarasý ózenindegi muz keptelisin joıdy.
Muz jarý jumystary Qarasý aýdanyna qarasty Novoselov aýylynan 3 shaqyrym jerdegi Qundyzdy ózeninde, Qarasý aýylynyń mańynda, Naýyrzym aýdanyndaǵy Býrevestnık aýylyna jaqyn jatqan bógetterde, Áýlıekól aýdany Kóktal aýylynyń mańyndaǵy Terekti ózeniniń saǵasynda júrip jatyr.
– Muzdyń ortasha qalyńdyǵy 1 metrden asady. Muz jarý jumystarymen tótenshe jaǵdaı qyzmetkerleri, polıseıler men jergilikti atqarýshy organdardyń ókilderi jáne NIKSIT seriktestiginiń mamandary aınalysyp jatyr. Jarylys kezinde barlyq qaýipsizdik sharalary eskeriledi, – dep málimdedi oblystyq TJD-nyń qoǵammen baılanys toby.
Qostanaı oblysy