Petropavl qalasyndaǵy eń sáýletti saraıda «Ultyn súıgen ulylar» atty respýblıkalyq ǵylymı-praktıkalyq konferensııa ótti. Bul konferensııa Soltústik Qazaqstan oblysynan shyqqan ataqty aqyn-jazýshylar – ultymyzdyń maqtanyshy Ǵabıt Músirepovtiń – 120, Safýan Shaımerdenovtiń – 100 jáne Kákimbek Salyqovtyń 90 jyldyq mereıtoılaryna arnaldy.
Konferensııany «Daryn» memlekettik jastar syılyǵynyń laýreaty, Qazaqstan Respýblıkasynyń eńbek sińirgen qaıratkeri Dáýletkereı Kápuly ashyp, júrgizip otyrdy. Alǵashqy sózdi oblys ákiminiń orynbasary Ǵanı Nyǵymetov alyp, Almaty men Nur-Sultannan kelgen qadirli qonaqtarǵa rızashylyǵyn bildirip, jerles jazýshylarymyzdyń esimin oblys turǵyndary maqtan etetinin, jas urpaqty tárbıeleýde olardyń shyǵarmashylyǵy men ónegesi árqashan úlgi ekenin atap ótti. «Búkil Qazaqstan halqy bizdiń jerlesimiz Ǵabıt Músirepovtiń shyǵarmalaryn, sonymen qatar onyń ulttyq ádebıetimizdiń ósip-órkendeý jáne damý jolynda eren eńbek etkenin jaqsy biledi. Bıyl aıtýly tulǵanyń mereıtoıy barlyq mádenıet oryndary men mektepterde atalyp ótýde.
Sonymen qatar qabyrǵaly qalamger Safýan Shaımerdenovtiń 100 ataqty aqynymyz Kákimbek Salyqovtyń 90 jyldyǵy da keńinen toılanýda. Biz osyndaı jerlesterimizdi maqtan tutamyz», dedi ol.
Konferensııada Qazaqstannyń eńbek sińirgen qaıratkeri, «Parasat» jáne «Qurmet» ordenderiniń ıegeri, halyqaralyq aıtys aqyndary men jyrshy-termeshiler odaǵynyń tóraǵasy, aqyn Júrsin Erman, Jazýshylar odaǵy tóraǵasynyń birinshi orynbasary Aqberen Elgezek jáne t.b. quttyqtaý sózderin aıtty. A.Elgezektiń bir sózinde Qazaqstan Jazýshylar odaǵyn Soltústik Qazaqstan oblysynan shyqqan S.Muqanov, Ǵ.Músirepov jáne Ǵ.Toǵjanov sııaqty úsh birdeı qaıratkerdiń basqarǵanyn jáne ondaı jetistik basqa birde-bir oblystan shyqpaǵanyn eske salǵany kópshilikti eriksiz eleń etkizdi. Sonymen qatar ol Ǵabeńniń tóraǵa bolǵandaǵy erlikterin, Almatynyń qaq ortasynan Jazýshylar odaǵyna ǵımarat alyp bergenin de aýyzǵa alǵany jınalǵan qaýymnyń qulaǵyna jaǵyp otyrdy. Baıandamashylar qatarynda bolǵan «Soltústik Qazaqstan» oblystyq gazetiniń bas dırektory Jarasbaı Súleımenov «Táýelsizdik jyldaryndaǵy Soltústik Qazaqstan oblysyndaǵy ádebıettiń damýy», Qazaqstannyń eńbek sińirgen qaıratkeri, aqyn Ǵalym Jaılybaı «Kákimbek Salyqov – qaıratker, aqyn, azamat», «Egemen Qazaqstan» gazetiniń Soltústik Qazaqstandaǵy menshikti tilshisi Jaqsybaı Samrat Ǵabıt Músirepovke arnalǵan «Mogıkannyń sońǵy tuıaǵy», M.Qozybaev atyndaǵy Soltústik Qazaqstan ýnıversıtetiniń professory, fılologııa ǵylymdarynyń kandıdaty Janar Talaspaeva «Safýan Shaımerdenov – kórkemsóz sheberi» atty baıandamalaryn oqydy.
Osy keshte soltústikqazaqstandyq jas jazýshylar Amanjol Zaǵypardyń «Taǵdyrymnyń tamshylary», Nurgúl Oqashevanyń «Nur», Saǵyndyq Sábıtulynyń «Dóńdegi aýyl» jáne Qyzyljar aqyndary antologııasynyń tusaýkeser rásimi boldy. Tórt kitap ta oblystyq ákimdiktiń qoldaýymen jaryq kórgen.
Kesh barysynda Safýan Shaımerdenovtiń nemere inisi Saıyn Esmaǵı sóz alyp jazýshynyń esimin halyqtyń esinde saqtaý baǵytynda atqarylmaı jatqan ister týraly óziniń ókinishti oılaryn jetkizdi. Oǵan oblys ákiminiń orynbasary Ǵanı Nyǵymetov jaýap berip, synnyń oryndy ekenin, ony túzetýge kúsh salynatynyn jetkizdi.
Kesh sońynda Jazýshylar odaǵy tóraǵasynyń birinshi orynbasary Aqberen Elgezek jergilikti jas aqyndar Amanjol Zaǵypar, Kúlaıhan Rahmet, Nurgúl Oqashevany jáne prozashy Saǵyndy Sábıtulyn Jazýshylar odaǵyna múshelikke qabyldap, jazýshy kýáligin tapsyrdy.
Al ertesine osy taqyrypta respýblıkalyq aqyndar aıtysy ótti. Ony jyrshy-termeshiler odaǵynyń tóraǵasy Júrsin Erman júrgizdi. Aıtysqa Qazaqstannyń barlyq túkpirinen Rústem Qaıyrtaı, Erkebulan Qaınazar, Qalıjan Bildásh, Meıirbek Sultanhan, Tólegen Jamanov jáne t.b. júırikter qatysyp, qomaqty júldeni sarapqa saldy.
Soltústik Qazaqstan oblysy