Ál-Farabı atyndaǵy QazUÝ jýrnalıstıka fakýltetinde Qojakeev oqýlary aıasynda «Temirbek Qojakeevtiń satıralyq jáne ádebı murasy: tanym men talǵam tabıǵaty» taqyrybynda ǵylymı-ádistemelik konferensııa ótti.
Jıynǵa qatysýshylar qazaq satırasynyń damýyna zor úles qosqan ǵalymnyń ómiri men shyǵarmashylyǵyna qatysty estelikterimen bólisti. «Qojakeevtiń qundy qazynasy» baıandamasynda Qazaqstan Jazýshylar odaǵy Satıra keńesiniń tóraǵasy Ermahan Shaıhy «Temirbek Qojakeuly – qazaq satırasyn egjeı-tegjeıli zerttep, satıralyq janrlar júıesin jete zerdelegen hám teorııalyq jaǵynan negizdegen ǵalym. Buǵan deıin qazaq áde-bıettaný ǵylymynda satıra men ıýmordy tereń zerttep, taldaǵan ǵalym bolǵan joq. Ǵalymnyń qalamynan týǵan ǵylymı eńbekterdi jınaqtasa, qazaq satırasynyń ensıklopedııasy sekildi tolymdy dúnıe ári bolashaq oqyrmandar men jas zertteýshiler úshin asa qundy ǵylymı eńbek bolar edi», dep atap ótti. E.Shaıhy jáne de stýdenttik jyldardy eske ala otyryp, ustazdyń ǵıbratty ǵumyry, qazaq baspasóziniń damýyna qosqan úlesi, shákirtterine degen talapshyldyǵy haqynda oı tolǵady.
Ál-Farabı atyndaǵy QazUÝ jýrnalıstıka fakýltetiniń dekany Sansyzbaı Mádıev esimi jýrnalıstıka fakýltetimen qatar atalatyn Temirbek Qojakeev murasynyń búgini ǵana emes, keler urpaq úshin de qundy ekenin eske salsa, ustazyn «Temirdeı tártiptiń adamy bolatyn» dep atap ótken Jazýshylar odaǵy basqarmasy tóraǵasynyń orynbasary, fılologııa ǵylymdarynyń doktory, professor Baýyrjan Jaqyp shákirt ári áriptes bolǵan jyldardaǵy estelikterimen bólisti.
Osy jıynda sondaı-aq satırık T.Álimbekuly, A.Iаsaýı atyndaǵy QTÝ professory B.Serdáli, HATÝ Medıakommýnıkasııa jáne Qazaqstan tarıhy kafedrasynyń professory A.Beısenqulov, satırık, Jambyl radıosynyń jetekshisi B.Sovetuly, Halyqaralyq «Alash» syılyǵynyń laýreaty N.Qalqa, «Shalqar» radıosynyń dırektory B.Tólepbergen, Ál-Farabı atynaǵy QazUÝ dosentteri G.О́zbekova, R.Jaqsylyqbaeva, L.N.Gýmılev atyndaǵy EUÝ kafedra meńgerýshisi G.Áshirbekova, Ál-Farabı atyndaǵy QazUÝ Baspasóz jáne elekrondy baq kafedrasynyń meńgerýshisi G.Sultanbaeva, taǵy basqa da ǵalymdar ustaz murasyna qatysty baıandama jasap, oılaryn ortaǵa saldy.
Jambyl oblysy Merki aýdany T.Qojakeev atyndaǵy №39 jalpy orta mektep gımnazııasynyń «Qojakeevtanýshylar» klýbynyń músheleri de osy jıynǵa qatysty. Al pýblısıstıka, ǵylymı jumys jáne mýltımedıalyq jobalar atalymy boıynsha Qojakeev otbasy taǵaıyndaǵan shákirtaqyǵa 9 stýdenttik jumys laıyqty dep tabyldy.
Osy is-sharaǵa oraı Ál-Farabı kitaphanasynda aqparattyq-qujattyq kórme uıymdastyrylyp, oqyrmandarǵa kitaphana qorynan ǵalymnyń ómiri men shyǵarmashylyǵy týraly materıaldar tanystyryldy. «Qaıtalanbas nar tulǵa», «Temirbek Qojakeev – ustaz, ǵalym, qaıratker» taqyrybynda jalǵasqan ıgi sharalar ǵalymnyń qazaq ádebıeti men jýrnalıstıkasyna, sondaı-aq ulttyq satıranyń damýyna arnaǵan eńbekteriniń ýaqyt talabymen úndeskendigin aıshyqtaı tústi.
ALMATY