Zoologııa ınstıtýty ǵalymdarynyń derekteri boıynsha, Ile Alataýy ulttyq parkiniń aýmaǵynda memleket qorǵaýyna alynǵan Tıan-Shan qońyr aıýy mekendeıdi.
Ile Alataýy ulttyq parki, Zoologııa ınstıtýty jáne Aıýsaı vızıt-ortalyǵynyń uıymdastyrýymen ótken «Tıan-Shan qońyr aıýy» aptalyǵy aıasynda Qazaqstannyń Qyzyl kitabyna engen jyrtqyshty qorǵaýdyń mańyzy men onyń tirshilik etý aýmaǵy joǵary oqý oryndary stýdentteri, mektep oqýshylary men buqaralyq kommýnıkasııa ókilderine tanystyryldy. Búginde bul aýmaqta 70-ke jýyq aq tyrnaqty jyrtqysh tirshilik etedi.
Fototuzaqtardaǵy kadrlar, qońyr aıýdyń izi túsken aýmaqty barlaý, elimizdiń jetekshi terıologterimen taý taǵysy jaıynda pikirlesý qatysýshylar úshin qyzyqty aqparattarǵa toly boldy. Zoologııa ınstıtýty Terıologııa zerthanasynyń ǵylymı qyzmetkeri, Halyqaralyq aıýlar jónindegi mamandar assosıasııasynyń múshesi, ekologııa magıstri Sanjar Qańtarbaev qońyr aıý mekendeıtin Ile Alataýynyń erekshelikteri týraly aıtyp berdi.
S.Qańtarbaevtyń aıtýynsha, Aıýsaı shatqalynda 2010 jyldan bergi aralyqta kóktemnen kúzge deıin ár maýsymda osy jyrtqyshtardyń izderi men ózge de belgilerin baıqaýǵa bolady. Búginde elimizde aıýdyń eki túri mekendeıdi. Biri – sibir qońyr aıýy bolsa, ekinshisi Tıan-Shan qońyr aıýy. Qazaqstan men shekaralas aımaqtarda aq tyrnaqty aıý HH ǵasyrdyń basynda kóbeıgenimen, 70-jyldary sany kúrt tómendep ketken. Sońǵy jyldary zoolog mamandar jáne memlekettik ınspektorlar kúsh-jigeriniń nátıjesinde Ile Alataýynyń bókterinde mekendeıtin qońyr aıý kóbeıip, sońǵy bes jyldaǵy kórsetkishter mamandardy qýantyp keledi. Shatqaldyń Aıýsaı atalýynyń da sebebi osynda bolsa kerek.
Degenmen, qala mańyna úıirsek jyrtqyshtan qaýip bar. Taý bókterine qalalyqtar jıi serýenge shyǵatyndyqtan, aıýdyń adamǵa tosynnan tap berýi múmkin ekenin de joqqa shyǵarmaıdy mamandar. Sondyqtan Aıýsaı vızıt-ortalyǵynyń qyzmetkerleri Zoologııa ınstıtýty mamandarynyń usynysy boıynsha shatqaldaǵy demalýshylarǵa túsindirý jumystaryn júrgizip, úshinshi sarqyramadan joǵary kóterilmeýin qatań eskertedi. Mamandar atap ótkendeı, janýarlardyń tirshiliginen habardar bolý – qorshaǵan ortaǵa degen janashyrlyqty, taý ekojúıesin qorǵaý men ekologııalyq mádenıetti damytýǵa baǵyttalǵan izgi qadam.
ALMATY