Qyzylordada «Ahmet Baıtursynuly – qazaq jazýynyń reformatory jáne latyn qarpine kóshýdiń búgingi jaı-kúıi» atty respýblıkalyq ǵylymı-tanymdyq konferensııa ótti. Orda joǵary kolledjiniń uıymdastyrýymen ótken sharaǵa elimizdiń ár túkpirinen onlaın formatta qatysqan ǵalymdar konferensııa taqyrybyna saı baıandama jasady.
UǴA akademıgi, fılologııa ǵylymdarynyń doktory, professor Sherýbaı Qurmanbaıuly «Ahmet Baıtursynuly jáne kirme sózder máselesi» taqyrybynda baıandama jasasa, taǵy bir kórnekti ǵalym – akademık, fılologııa ǵylymdarynyń doktory, professor Dıhan Qamzabekuly Ahańnyń Alash rýhanııatyn sapalandyrý jobasy jaıynda oı órbitti.
Batys Qazaqstan ınnovasııalyq-tehnologııalyq ýnıversıtetiniń professory, fılologııa ǵylymdarynyń doktory Murat Sabyr Baıtursynuly kótergen bilim berý saıasaty týraly aıtyp ótti, Memlekettik tildi damytý ınstıtýtynyń atqarýshy dırektory, fılologııa ǵylymdarynyń kandıdaty Bıjomart Qapalbek Ahmet Baıtursynulynyń bastaýysh mektepte bilim berýdegi ustanymdaryn taldady. Tildiń áleýmettik saralanýy máselesin Ahmet Baıtursynulymen baılanystyra baıandaǵan Qorqyt ata atyndaǵy Qyzylorda ýnıversıtetiniń qaýymdastyrylǵan professory, fılologııa ǵylymdarynyń kandıdaty Aman Abasılov tujyrymy da ult ustazynyń 150 jyldyǵyna oraı uıymdastyrylǵan konferensııadaǵy qyzyqty taqyryptardyń biri boldy.
QYZYLORDA