Energyprom sarapshylarynyń zertteýlerine sáıkes, Qazaqstanda ımporttyq taýarlar men azyq-túliktiń baǵasy 13%-ǵa deıin qymbattaǵan, dep habarlaıdy Egemen.kz.
«Qańtar aıynyń qorytyndysy boıynsha qazaqstandyq óndirýshiler azyq-túlik suranysynyń basym bóligin jergilikti ónimmen qamtamasyz ete aldy. Un - 99,7%, jumyrtqa - 97,2%, jarma men kúrish - 96,6%, qus eti - 95,5%, ósimdik maıy - 88,8%, makaron ónimderi - 96,6%, kespe jáne basqa da uqsas un ónimderi - 85,1% jergilikti ónimmen qamtyldy. Sút ónimderi segmentinde ózindik qamtý deńgeıi – 84,4%. Dese de, jergilikti óndirýshiler sary maıǵa degen suranystyń 67,9%, irimshik ónimderine degen suranystyń 53,7% ǵana jaba bildi», deıdi zertteýshiler.
Bul rette shujyq ónimderiniń 62,3%, kókónis pen jemistiń 50,2%, óńdelgen jáne konservilengen balyqtyń 47,6%, shokoladtyń 36,2%, qanttyń 35,8%, shaı men kofeniń 29,9% jergilikti ónimmen qamtylǵan.
«Qańtar aıynyń qorytyndysy boıynsha ımporttyq taýar men azyq-túlik baǵasy bir jylda 12,8%-ǵa qymbattaǵan. Onyń ishinde TMD elderinen keletin ımporttyń baǵasy 21,3%, ózge elderden keletin taýar baǵasy 4,9%-ǵa ósken. Azyq-túliktiń ishinde qant pen qanttan jasalatyn kondıterlik ónim baǵasy 38,7%, et, balyq, teńiz ónimderiniń baǵasy 32,3%, maı ónimderi 26,9%, shujyq ónimderi 20,6%, kúnbaǵys maıy 15%-ǵa qymbattaǵan», dep naqtylady sarapshylar.