Elimizdiń kóterme jáne bólshek saýda salasynda turaqty ósim baıqalady. 2021 jyldyń qorytyndysy boıynsha kóterme-bólshek saýdanyń jalpy kólemi 42,2 trln teńgeni, ıaǵnı 100 mlrd dollardy quraǵan.
Bul týraly QazTrade AQ bas dırektory Azamat Asqaruly Tashkentte ótken halyqaralyq ınvestısııalyq forým aıasynda aıtty, dep habarlaıdy Saýda jáne ıntegrasııa mınıstrliginiń resmı saıty.
Azamat Asqarulynyń aıtýyna qaraǵanda, kóterme-bólshek saýda kólemi pandemııaǵa deıingi kezeńde jylyna 7,6%-ǵa ósken. 2020 jyly qatań karantın aıasynda salada 7,2%-ǵa quldyraý baıqalǵan. Biraq byltyr ósim qaıtadan 9,2%-dy qurapty. «Bıyl da ósim jalǵasyp keledi. 2022 jyldyń alǵashqy eki aıynda onyń kólemi 6,1%-ǵa jetti, biraq bólshek segmentte 7,5%-ǵa tómendeý baıqaldy», dedi ol.
Mınıstrliktiń baspasóz qyzmetiniń habarlaýynsha, pandemııa elektrondy kommersııany damytýdyń draıverine aınalǵan. О́tken jyly Qazaqstanda tólem kartochkalaryn paıdalaný arqyly jasalatyn tranzaksııalar kólemi 220 mlrd dollardan asqan. Osylaısha, 2014 jyldan beri Qazaqstanda elektrondy saýda kólemi 10 esege artypty. Endi mamandar 2025 jylǵa qaraı el rıteıliniń jalpy kólemindegi e-kommersııa úlesin 15%-ǵa deıin jetkizýdi maqsat etip otyr. О́tken jyldyń 9 aıynda onyń úlesi shamamen 11%-dy quraǵan.
Búgingi tańda Qazaqstanda 100-den astam ınternet-dúken men 20 jergilikti jáne halyqaralyq marketpleıster jumys isteıdi. Eń iri qazaqstandyq onlaın-alańy – Kaspi.kz. Onyń aınalymy orta eseppen 1 mlrd dollardy quraıdy. Endi Arbuz.kz onlaın-sýpermarketi de halyqaralyq deńgeıge shyǵýdy josparlap otyr. Budan bólek, elimizdegi iri marketpleısteriniń biri Flip.kz jáne Satu.kz alańdaryn aı saıyn 5 mıllıonnan astam adam paıdalanady eken.