Japondardyń juldyzy jarqyraı jandy

Atalǵan jup Qazaqstan chempıonatynda úsh márte top jarǵanymen, halyqaralyq arenada aýyz toltyryp aıtar­lyqtaı tabystarǵa qol jetkize alǵan joq. 2018 jyly Gaýhar Naýryzova men Boısangýr Datıev Sofııada ótken jastar arasyndaǵy álem birin­shiligine qatysyp, 27-oryn­dy qanaǵat tutty. 2017 jyly Bratıslava Gran-Prıinde besinshi jáne 2019 jyly Christmas Cup týr­nırinde tórtinshi satyǵa taban tiredi. Eresekter dýyna qosylǵannan keıin Bý­dapesht pen Almatyda uıym­dastyrylǵan eki birdeı halyqaralyq jarysta úzdik segizdiktiń sana­tynan kórindi. Mine, jerlesterimizdiń barlyq tabysy osy ǵana. Al Monpelede kileń myqtylardyń jınalǵanyn eskersek, dýaly aýyz mamandar olardyń úzdikter qa­taryna qosyla almaıtynyn aldyn ala joramaldaǵan edi. Aıtqandaı-aq, qysqa baǵ­darlamada qorytyndysy boıynsha Gaýhar men Boı­sangýr sońǵy orynda qalyp qoıyp, jarystyń fınaldyq bóligine shyǵa almady.

Erler arasyndaǵy bas júlde úshin tartys japon jigitteri arasynda ór­bidi. Qysqa baǵdarlamada alǵashqy úsh oryndy da solar ıelendi. Úsh dúrkin Olımpııa oıyndarynyń jáne eki dúrkin álem chempıonatynyń kúmis júldegeri Sema Ýno kósh bas­tasa, Tokıo Olımpıadasynyń vıse-chempıony Iýma Kagııama ekinshi satyǵa jaıǵasty. Úshinshi orynǵa buǵan deıin kópshiliktiń kózine túspegen Tomono Kadzýkı taban tiredi. Erkin baǵdarlamada alǵashqy ekeýi óz oryndaryn saqtap qaldy. Nátıjesinde, 312,48 upaı jıǵan Ýno bas júldeni oljalasa, 297,60 upaıdy enshilegen Kagııama kúmiske qol sozdy. Al Kadzýkıdi jyly ornynan ysyrǵan amerıkalyq Vınsent Chjoý osydan úsh jyl burynǵy Saıtamadaǵy kór­setkishin qaıtalap, qola medaldy ıelendi. Onyń enshi­sinde – 277,30 upaı.

Áıelder básekesiniń bas júldesi de Japonııanyń má­nerlep syrǵanaýshylaryna buıyrdy. 21 jastaǵy Beıjiń Olımpıadasynyń qola júl­degeri Kaorı Sakomoto 236,09 upaımen altynnan alqa taq­ty. Kúmis medaldy Lýna Hen­drıks moınyna ildi. Ázirge bul – 22 jastaǵy belgııalyq bu­rymdynyń sporttyq man­sabyndaǵy eń zor tabysy. Ol 217,70 upaı jınady. Qola me­dal­dy Alısa Lıý enshiledi. 16 ja­staǵy amerıkalyq boıjetken 211,19 upaıdy qorjynǵa saldy.

Sporttyq juptardyń sa­ıysyn­da Aleksa Knırım men Brendon Freızer aldaryna jan salmady. Komandalyq básekede Olımpııa oıynda­rynda eki márte júlde alyp, 2015 jylǵy álem chempıony jáne 2021 jylǵy dúnıe­júzilik dodanyń kúmis júl­degeri degen ataǵy bar ame­rıkalyq sportshylar bul joly eshkimge des bermedi. Japonııalyq Rıký Mıýra men Rıýıtı Kıhara kúmispen kúptelse, kanadalyq Vanessa Djeıms pen Erık Redford qolaǵa qol sozdy.

Esterińizge sala keteıik, basty favorıtterdiń biri ári biregeıi sanalǵan Reseı qu­ramasy Ýkraınadaǵy jaǵdaıǵa baılanysty Monpele­degi jarystan shet­tetildi. Dál sondaı jaza Belarýs komandasyna da qoldanyldy.