Elimizde sońǵy eki aı ishinde polısııa qyzmetkerleri 378 esirtki qylmysyn anyqtap, 7 zerthanasyn joıǵan. Tirkelgen qylmystardyń 248-i esirtki zattaryn ótkizýge, 85-i asa iri mólsherde saqtaýǵa qatysty.
Qańtar jáne aqpan aılarynda esirtki qylmysymen kúres júrgizetin polıseıler 422 kılo esirtki, onyń ishinde 196 kılo gashısh, 213 kılo marıhýana jáne 6 kılodan astam sıntetıka tárkilegen. IIM esirtki qylmysyna qarsy is-qımyl departamenti basqarmasynyń basshysy Baqytjan Ámirhanovtyń málimdeýinshe, qazirdiń ózinde zańsyz aınalymnan alynǵan sıntetıka kólemi 40 kıloǵa jýyqtaǵan.
Internettegi esirtki saýdasyn anyqtap, qylmyskerlerdi áshkereleý úshin engizilgen «Kıberqadaǵalaý» aqparattyq júıesi de óz nátıjesin kórsetip otyr. Bul júıe Aqparat jáne qoǵamdyq damý mınıstrligine osyndaı ınternet resýrstardy buǵattaý úshin siltemelerdi avtomatty rejimde jiberýge múmkindik beredi. Máselen, jyl basynan beri Aqparat mınıstrligine osyndaı 440 ınternet resýrs, onyń ishinde 150-den astam telegram arna buǵattaýǵa jiberilgen. Sondaı-aq IIM ınternet álemin jaýlap alǵan esirtki saýdagerleriniń zańsyzdyqtaryn der kezinde áshkereleý maqsatynda bilikti IT mamandaryn tartyp, ishki ister organdarynyń tehnıkalyq áleýetin nyǵaıtýǵa den qoıyp otyr. Osyǵan oraı Astana IT Universit-men qashyqtyqtan bilim berý tehnologııalaryn qoldaný arqyly baǵdarlamalar men derekter bazasyn ázirleýdi kózdeıtin ǵylymı-zertteý salasyndaǵy ózara is-qımyl týraly memorandýmǵa qol qoıylǵan. «OLX Group sııaqty eń tanymal platformalarmen ózara is-qımyl jasaýǵa da erekshe mán berip otymyz. Sonyń arqasynda bıyl kýrerlik jumystyń atyn jamylyp esirtki saýdalaǵan 50-den astam habarlandyrý alynyp tastaldy. Mundaı jumystar qazirgi tańda Telegram serveriniń qazaqstandyq nusqasymen de júrgizilýde. Telegram arnasynda da esirtkini jasyryn satýmen aınalysatyn 440 chat anyqtaldy», deıdi IIM ókili.