Dzıýdodan Qazaqstannyń jastar quramasy Grekııanyń astanasy –Afınada ótken Eýropa kýbogynda bes qola júldege qol jetkizdi.
Ejelgi Ellada elindegi jarysta Nurqanat Serikbaev (60 kılo), Nursultan Zaızaǵalıev (66 kılo), Asanáli Abzalbek (73 kılo), Aıdar Arapov (90 kılo) jáne Jurqamyrza Shúkirbekov (100 kılo) úshinshi tuǵyrǵa kóterildi. Taǵy birneshe balýanymyzdyń da júldegerler sanatyna qosylýǵa jaqsy múmkindikteri bolǵan. Alaıda sheshýshi tusta óreskel qatelikke boı aldyrǵan olar qorytyndy esepte besinshi jáne jetinshi oryndardy qanaǵat tutty.
Osylaısha, jalyndy jastar bıylǵy maýsymdaǵy ózderiniń alǵashqy jarysyna qatysty. Iá, nátıje jaman emes. Alda jerlesterimizdi taǵy birneshe halyqaralyq doda kútip tur. Sol synaqtardan súrinbeı ótken órenderimiz álem jáne qurlyq birinshilikterinde kúsh synasý múmkindigine ıe bolady.