Ystanbulda ótken Reseı men Ýkraına arasyndaǵy kelissózdiń birqatar baǵytynda ilgerileý bar. Kezdesýden keıin Reseı Qorǵanys mınıstrliginiń ókili Ýkraınanyń soltústigindegi urys qımylynyń qarqyny azaıatynyn málimdedi.
Kıev delegasııasynyń ókili Aleksandr Chalyıdiń sózine súıensek, el azamattary kelisimge qatysty referendým ótkizýi kerek. Ony qabyldaý-qabyldamaý máselesi sol kezde sheshilmek. Biraq shartqa atysty tolyq toqtatýdan keıin ǵana qol qoıylady. Sodan keıin kelisimdi Ýkraına parlamenti men kepilger elderdiń parlamentteri ratıfıkasııalaýy tıis.
Ýkraına tarapy kelisimge qatysty birqatar usynys jasady. Máselen, taraptar Qyrym men Donbass máselelerin bólek talqylaýy kerek. Qyrym men Sevastopoldiń mártebesi týraly kelissózder 15 jylǵa sozylady. Taraptar osy merzimde máseleni sheshý úshin qarý qoldanýdan bas tartady. О́zderin memleket dep jarııalap alǵan aımaqtardyń ahýaly men taǵdyry týraly másele derbes qarastyrylmaq. Bul eki el prezıdentiniń kezdesýinde talqylanady.
Ýkraına birqatar memleket kepildik bergende ıadrolyq emes el mártebesine kelisýge daıyn. Bul da qujat júzinde bekitilýi tıis. Alda-jalda osy tarmaq oryndalsa, Ýkraına aýmaǵynda sheteldik áskerı bazalar men áskerı kontıngentter ornalastyrylmaıdy. Kıev tarapy eshqandaı áskerı-saıası odaqtarǵa kirmeýge kelisedi. Ýkraına aýmaǵynda halyqaralyq áskerı oqý-jattyǵýlar tek kepilger elderdiń kelisimimen ǵana ótkizilýi múmkin. Biraq Reseı Ýkraınanyń Eýropa odaǵyna múshe bolýyna kedergi keltirmeýi tıis.
Kıevten kelgen delegasııa Ulybrıtanııa, Qytaı, AQSh, Túrkııa, Fransııa, Kanada, Italııa, Polsha jáne Izraıldi kepilger memleket retinde kórgisi keletinin málimdedi. Eger Ýkraınaǵa qarsy soǵys nemese qarýly agressııa jasalsa, onda kepilger elder úsh kún ishinde kómek kórsetýge mindetti.
Reseı delegasııasynyń jetekshisi Vladımır Medınskıı Ystanbuldaǵy kelissóz konstrýktıvti túrde ótkenin málimdedi.
«Reseı Ýkraına usynǵan atysty toqtatý boıynsha kelissózderdi qarastyrady jáne bul jaıly prezıdent Pýtınge habarlanady. Beıbitshilik týraly kelisimdi eki eldiń syrtqy ister mınıstrligi rettegen soń Pýtın men Zelenskıı kezdesýi múmkin», dedi ol kelissózden keıin.
Reseı tarapy Ýkraınanyń soltústiginde áskerı is-qımylynyń qarqynyn azaıtatynyn málimdegenine qaramastan, aýyr artıllerııamen atqylaýdy jalǵastyryp jatyr. BBC agenttiginiń habarlaýynsha, Chernıgov ákimshiliginiń basshysy Vıacheslav Chaýs qala men onyń mańyndaǵy aýdandardy Reseı áskeri bombalaǵanyn aıtqan.
V.Chaýstyń sózine súıensek, oq atý saldarynan turǵyn úıler, ınfraqurylym, kitaphana ǵımarattary men saýda ortalyqtary zaqymdanǵan. Sondaı-aq ol 35 adam jaraqat alǵanyn jetkizgen. Al Nıkolaev qalasyndaǵy ákimshilik ǵımaratqa tastalǵan zymyrannan keıin qaza tapqandar sany 14 adamǵa jetti.
BUU málimeti boıynsha soǵys bastalǵaly beri 4 mıllıonnan astam adam Ýkraınany tastap ketken. Onyń ishinde 2,3 mıllıonnan astam bosqyn Polshaǵa, 608 myńnan astamy Rýmynııaǵa, 387 myńnan astamy Moldovaǵa, 365 myńdaıy Majarstanǵa ótip ketken.
Polshanyń premer-mınıstri Mateýsh Moraveskı jyl sońyna deıin reseılik munaıdan bas tartýdy josparlap otyrǵanyn habarlady. Qazirgi tańda Polshanyń munaı óńdeý zaýyttarynda óńdeletin shıki munaıdyń úshten ekisi Reseıden keledi.
Kúni keshe Reseı syrtqy ister mınıstri Sergeı Lavrov Qytaı syrtqy ister mınıstri Van Imen kezdesti. Kelissózder aldynda S.Lavrov Qytaıdy jańa «álemdik tártiptiń» bir bóligi dep atady. «Biz sizdermen jáne janashyrlarymyzben birge kóppolıarly, ádiletti, demokratııalyq álemdik tártipke qaraı jyljımyz», dedi Reseıdiń syrtqy ister mınıstri.
Qytaı syrtqy ister mınıstrliginiń baspasóz hatshysy Van Venbın jýrnalısterge bergen suhbatynda Máskeý men Beıjiń «jahandyq kóppolıarlyqty jáne halyqaralyq qatynastardy demokratııalandyrýdy» ilgeriletýdi jalǵastyratynyn aıtqan.