Qazaqstan ulttyq quramasy Ulttar lıgasy aıasynda elordada Moldova fýtbolshylaryn qabyldap, oıynnyń negizgi kezeńinde 0:1 esebimen jeńilip qalsa da, match sońyndaǵy penaltı serııasynda baǵy jandy – 5:4. О́z elimizde ótken kezdesýde jerlesterimiz jeńis úshin baryn salyp, matchty stadıonnan jáne teledıdar arqyly tamashalaǵan barsha fýtbol jankúıerin jigerli jeńisimen qýantty.
Osydan bir apta buryn Kıshınevtegi «Zımbrý» stadıonynda uıymdastyrylǵan alǵashqy kezdesý 2:1 esebimen Qazaqstan quramasynyń paıdasyna aıaqtalǵan edi. Osylaısha, eki oıynnyń qorytyndysy boıynsha 2:2 esebimen teń túsip, match sońyndaǵy penaltı serııasynda Moldovany qapy qaldyrǵan Qazaqstan quramasy ekinshi jyl qatarynan Ulttar lıgasynyń «S» lıgasynda óner kórsetetin boldy.
Aýa raıynyń asa qolaısyzdyǵyna qaramastan «Astana Arenaǵa» kelgen 12 myńnan astam jankúıerdiń qoldaýymen ótken qarymta kezdesýde Qazaqstan quramasynyń bas bapkeri mindetin atqaratyn Andreı Karpovıch oıynǵa taktıkalyq ózgeris jasamaǵanymen, alańǵa eki jańa fýtbolshy shyǵardy. Kıshınevtegi matchta óner kórsetken jartylaı qorǵaýshy Dýman Nárzildaev pen shabýylshy Alekseı Shetkınniń ornyna Islambek Qýat pen Abat Aıymbetovti birinshi mınýttan bastap oıynǵa aralastyrdy. Al Moldova quramasynyń bas bapkeri Sergeı Kleshenkonyń birinshi oıynǵa qaraǵanda azdaǵan taktıkalyq ózgeris engizgenin baıqadyq. Alǵashqy kezdesýde Kleshenko eki shabýylshy shyǵarǵan bolsa, bul joly tek bir shabýylshyǵa ıek artyp, qorǵanysqa basa mán bergenge uqsady.
Birinshi taımnyń 10-mınýtyna deıin match bizdiń jigitterdiń basymdyǵymen ótip jatqan edi. Alaıda az ýaqyt ishinde jasandy alańǵa boı úıretken qonaqtar kezdesýdiń nebári 13-mınýtynda Igor Shaskıı qorǵaǵan qaqpadan sańylaý tapty. Kezekti standart sátinde qajetti orynnan tabyla bilgen Moldova quramasynyń qorǵaýshysy Igor Armash «qaıshy» ádisimen tamasha gol soqty – 0:1. Moldovalyqtar gol soqqannan keıin qarqynyna qarqyn qosyp, birinshi taımnyń sońyna deıin qaqpashymyz ben qorǵaýshylarymyzdy ábden sastyrdy. Abyroı bolǵanda qarsylastar óz múmkindikterin tıimdi paıdalana almady.
Moldovadaǵy birinshi oıyndaǵydaı bizdiń jigitter bul jolǵy ekinshi taımda da belsendi boldy. Alǵash 63-mınýtta Abat Aıymbetovte baspen gol soǵatyn tamasha múmkindik bolsa, arada az ýaqyt ótkende Ashat Taǵybergenniń alystan baǵyttaǵan soqqysy qaqpadan sál qıys ketti. Al 82-mınýtta qorǵaýshy Nuráli Áliptiń aıyp alańynyń ishinen tepken dobyn bul joly qaqpashy Dorıan Reılıan qaıtardy. Moldovalyq fýtbolshylar ekinshi taımda da qarap qalǵan joq. Olarda da esepti eseleıtin bir-eki tamasha múmkindik boldy. Biraq qyraǵy qaqpashy Shaskıı ekinshi taımda qaqpasyn goldan aman saqtap qaldy.
Matchtyń negizgi ýaqyty 0:1 esebimen (eki oıynnyń qorytyndysy boıynsha esep – 2:2) aıaqtalǵan soń, kezdesý qosymsha taımǵa ulasty. 15 mınýttan turatyn eki ekstra taımda da fýtbolshylar bir-biriniń qaqpasyna gol soǵa almaı, jeńimpaz komanda oıyn sońyndaǵy penaltı serııasynda anyqtalatyn boldy. Fýtbol lotereıasy sanalatyn penaltı básekesin sátti bastaǵan qonaqtar á degennen 3:1 esebimen alǵa shyǵyp, jeńiske bir taban jaqyndaı tústi. Degenmen 11 metrlik núktege kelgen keıingi fýtbolshylarymyz óz múmkindikterin sátti paıdalanyp, tarazy basyn teńestirip úlgerdi. Stadıondaǵy jankúıerlerdiń qıqýy moldovalyqtarǵa qatty áser etken bolýy kerek, olar keıingi eki múmkindiginde múlt ketip, 5:4 esebimen jeńilis tapty. Osylaısha, Qazaqstan «S» lıgasyndaǵy ornyn saqtap qalsa, moldovalyqtar «D» lıgasyna syrǵydy.
Endi fýtboldan Qazaqstan quramasy aldaǵy maýsym aıynda bastalatyn Ulttar lıgasynyń úshinshi maýsymynda «S» lıgasynyń tórtinshi tobynda oınaıdy. Byltyr Nonda (Shveısarııa) ótken jerebe tartý rásiminde Qazaqstan – Moldova jubynyń jeńimpazy Slovakııa, Belarýs jáne Ázerbaıjan quramalarymen baq synaıtyny belgili bolǵan edi.
Bizdiń jigitter búginge deıin Belarýs jáne Ázerbaıjan quramalarymen ár jyldardaǵy álem jáne Eýropa birinshilikteriniń irikteý kezeńderinde, Ulttar lıgasynda jıi kezdesti. Iаǵnı eki eldiń fýtbol deńgeıi de, fýtbolshylary da bizdiń oıynshylar men jankúıerlerge jaqsy tanys. Al Slovakııamen halyqaralyq týrnırlerde tuńǵysh ret kezdespek. Tipti eki eldiń fýtbolshylary joldastyq kezdesý de ótkizbegen.
Slovakııa quramasy Ulttar lıgasynyń byltyrǵy maýsymynda «V» lıgasynyń úshinshi tobynda Chehııa, Shotlandııa jáne Izraılmen birge óner kórsetip, kósh sońynda qalyp qoıdy. Alty oıynnyń bireýinde Shotlandııany jeńip (1:0), bireýinde Izraılmen teń (1:1) oınady. Al qalǵan oıynnyń bárinde qarsylastaryna jol berdi. Sóıtip óz tobynda tórtinshi oryn alǵan slovakııalyqtary «V» lıgasynan «S» lıgasyna syrǵydy.
Ázerbaıjan fýtbolshylary byltyr Chernogorııa, Lıýksembýrg jáne Kıpr quramalarymen «S» lıgasynyń birinshi tobynda baq synady. Syrt alańda Kıprdi 1:0 esebimen jeńip, sońǵy úsh oıynda teń túsken Ázerbaıjan 6 upaımen úshinshi orynǵa ıe boldy. Aıta keteıik, Qazaqstan men Ázerbaıjan quramalary búginge deıin 8 ret jasyl alańda jolyǵyp, sonyń tórteýinde qazaqstandyq fýtbolshylardyń mereıi ústem bolǵan. Eki matchta Ázerbaıjan jeńiske jetse, eki oıynda komandalardyń kúshteri teń boldy.
Al Belarýs quramasy Qazaqstan, Albanııa, Lıtva fýtbolshylarymen bir topta synǵa tústi. Alty matchtyń úsheýinde jeńiske jetip (onyń ekeýinde Qazaqstan quramasynan basym tústi), bir kezdesýde teń oınady. Eki kezdesýde jeńilgen Belarýs Albanııadan bir upaı kem jınap,10 upaımen ekinshi orynǵa taban tiregen bolatyn.