Qaýipti aýmaqtar qadaǵalanýda

Kóktem týa qamdanǵanymen, áli de bolsa eldi mekenderdiń ishindegi qasat qar taý-teńiz. Kúrt erise eńistegi turǵyn úıler men aýylishilik joldardy qyzyl sýdyń basyp qalýy ábden múmkin. Qazir eldi mekenderdiń ishin qardan tazalaý jumystary qaýyrt júrgizilýde. Selınograd aýdanyndaǵy aýyldardan bir kúnniń ishinde myń tekshe metrden astam qar shyǵaryldy. Ár kún saıyn jergilikti atqarýshy bılik aýyl ishindegi soqtalanyp qalǵan qardy shyǵaryp, erigen sý ótetin jylǵalardy tazartyp, kólkigen qyzyl sýdy tehnıka arqyly soryp alyp, adamdarǵa bógeti joq oıpań jerlerge aǵyzyp jiberýde. Aqmol aýylyndaǵy Gagarın, Cheremýshkı, Isenov kóshelerinde jınalyp qalǵan qar sýy nasostarmen sorylyp alyndy. Osyndaı ju­mystardyń nátıjesinde, jaıaý júr­ginshiler júretin jol birshama qurǵaq ári yldıdaǵy turǵyn úılerge qaýip tónbeıdi.

Qabanbaı batyr aýylyndaǵy Nura kóshesiniń boıyna qar sýy jınalyp qalǵan bolatyn. Bul jerden 140 tekshe metr sý soryldy. Qyzyljar aýylyndaǵy erigen qar sýy jınalatyn kanal kúl-qoqystan tazartylyp, sýdyń joly arshyldy. Erigen qar sýyn Nura ózeniniń ańǵaryna baǵyttaý úshin shamamen alǵanda 60 metrge jýyq jyranyń boıy tazalandy. Talapker aýylyndaǵy Bógenbaı batyr kóshesiniń boıynan erigen sý shyǵaryldy. Qajymuqan, Barshyn kósheleriniń qos qaptalynan 550 tekshe metr qar shyǵarylyp, eldi meken syrtyndaǵy oıpań jerlerge jetkizildi. Qarótkel aýylyn da qyzyl sýdan qorǵaý jumystary muqııat júrgizilýde.

О́ńirde dál qazir ózenderdiń boıyndaǵy muz jarylyp, aǵyn sý keptelissiz ótetin múmkindik jasalýda. Naýryz aıynyń sońynan bastap qolǵa alynǵan osy jumys birshama qarqyndy júrgizilýde. R.Qoshqarbaev, Qabanbaı batyr, Taıtóbe, Aqmol, Qaraótkel tárizdi aýyldyq okrýgterdiń janyndaǵy Nura ózeni arnasynyń onnan astam teliminde muz jarý jumystary áli de júrgizilýde.

Aýyl turǵyndary jalpyǵa ortaq jumysqa jumyldyryldy. Tótenshe jaǵdaı qyzmetindegiler kóktemgi sý tas­qynynyń aldyn alý úshin qaýip­ti jerlerdi udaıy qadaǵalaýda. Osy­laısha, el bolyp tasqynǵa berik tos­qaýyl qoıylmaq.

Aqmola oblysy