Sulýlyq sılýeti

Jas sýretshi Nurahmet Nur­bol – ómirge tereń fıloso­fııalyq kózqaraspen qaraıtyn daryn ıesi. Onyń shyǵarmashylyq galereıasy rýh keńistiginde tereń túsinikter men tańǵajaıyp ta­nymdarmen tamyrlasyp, ádep­ki oı júıesinen jyraqqa je­teleıdi. Qarańyzshy, «Názik jan» kartınasy kórer kózge anyq kórinis bolǵanymen, ishke buqqan qupııasy ońaılyqpen ashylmaıdy.

Jas sýretshiniń barlyq jumystary elimizdiń búgingi ómirinde bolyp jatqan túrli qubylystarǵa tereń oı-tol­ǵaýlary men mazasyzdaný sezim­derimen aıqyndalǵan. Osy oraıda, ózindik jeke dúnıetanymy bar jáne ony bizge óz kartınalary arqyly jetkizýge qushtar sýretshi shyǵarmashylyǵyn qamtıtyn basty taqyryptyń biri – tús jáne tús kórý. Uıqy jáne tús uǵymdary bir sát shynaıy ómirden arylýǵa, kóz jumyp ýaıym-qaıǵydan alshaq­taýǵa ákeledi.

Psıholog Zıgmýnd Freıdtiń aıtýynsha «tús − adamnyń shynaıy ómirdegi armanyna, tilegi men yqylasyna jáne ynty­zarlyǵyna qolyn jetkizip, kóńilin tynyshtandyratyn tylsym qubylys». Olaı bolsa atalǵan taqyrypty sıpattaıtyn sýretshiniń «Názik jan» týyn­dysy – kúrdeli rakýrsta ja­zylǵan kompozısııanyń biri.

Baqsańyz, týyndydaǵy keıip­­kerlerdiń barlyǵy uıqy ús­tinde. Nege olar uıyqtap jatyr? Uıqydaǵy keıipkerler ty­nyshtyqpen ári jalǵyzdyqpen tildesetindeı. Olar qatań, sta­tıkalyq kúıde jazylǵan, sebe­bi eshqandaı qozǵalys joq. Ol óziniń keıipkerlerin tústik jazyqtyq betine ornalastyrǵan jáne olardyń árqaısysy óz ále­minde ómir súredi. Bul jumys­tarynda avtor adamzat balasyna oı tastap, syn aıtyp turǵandaı.

Sýretshi óz jumystary jaıly: «Adamdar búgingi ómirinde qaıshylyqqa urynyp, qaýymnyń aǵymyna ilesip, qıyndyqtarǵa kóz jumǵysy keletindeı. Eli­mizge qys túskendeı, hal­qy­myzdyń tereń uıqyǵa batqa­nyn sezemin. Sol uıqyda shy­naıylyq pen saǵymnyń arasyn­da jańylǵandaı, adamdar kóz­derin ashýǵa asyqpaıdy», dep tujyrymdaıdy. Bul avtordyń ishki jan kúızelisinen habar beretindeı.