Kreml sheptegi jaǵdaıdan habarsyz ba?

Túrkııalyq dıplomattyń aıtýynsha, osy aptada Ystanbulda ótken kelissózderiniń qorytyn­dysy boıynsha D.Kýleba jáne S.Lavrov telefon arqyly sóıles­ken. M.Chavýshoǵlý reseı­lik mıllıarder Roman Abramo­vıch­tiń Ýkraına men Reseı bas­shylary arasyndaǵy baılanys or­natýda paıdaly ról atqar­ǵanyn jetkizdi.

Sonymen qatar Túrkııa Syrtqy ister mınıstri Ystan­bulda qol jetkizilgen ýaǵdalas­tyqtar barysynda aıtylǵan mindetteme­ler oryndalmaı jatqanyna nazar aýdardy. Reseı tarapy M.Chavýshoǵly­nyń sózine baılanysty pikir bil­­di­rip, Máskeýdiń S.Lavrov pen D.Kýleba kezde­sýinen bas tartpaıtynyn aıtqan.

AQSh barlaý agenttikteri Reseı Prezıdenti Vladımır Pýtın shynaıy ahýaldan habarsyz dep esepteıdi. Olar­dyń keltirgen baıandamasyna súıensek, Kreml basshysynyń aı­na­lasyndaǵylar oǵan ne bolyp jatqany týraly naqty jáne tolyq aqparat bermeıtin kórinedi. «Pýtınge reseılik áskerıler qate aqparat beretini týraly aqparat qolda bar. Bul Pýtın men áskerı basshylyq arasyndaǵy shıelenistiń jal­ǵasýyna ákelip soǵady. Pý­tın­ge keńesshiler Reseı ás­keri­niń sátsizdigi jáne el eko­no­mı­ka­sy­nyń sanksııalardan qan­shalyq­ty zardap shekkeni týraly qate aqparat berip otyr dep sanaımyz», dedi Aqúıdiń kommýnıkasııalar jónindegi dırektory Keıt Bedıngfıld jýrnalısterge bergen suhbatynda.

K.Bedıngfıldtiń aıtýynsha, D.Baıden ákimshiligi Ýkraınamen qarýly qaqtyǵystyń Reseıge qanshalyqty strategııalyq zardap ákelgenin kórsetý úshin mundaı aqparatpen bólisýge sheshim qabyldaǵan. Keıt Bedıngfıld AQSh barlaý qyzmeti málimetterdi qalaı jınaǵany, kimnen alǵany qupııa dep málimdedi.

GCHQ ulybrıtanııalyq elekt­rondy barlaý basshysy Dje­remı Flemıngte osyndaı pikirdi ustanyp otyr. Onyń aıtýynsha, Reseı Prezıdenti Vladımır Pýtın Ýkraınaǵa ásker attandyrmas buryn óziniń áskeri­niń de, qarsy taraptyń da kúshin durys baǵa­l­amaǵan. Endi Kreml bas­shysynyń aınala­syndaǵylar naqty jaǵdaı týraly esep berýge qorqatyn kóri­nedi. «Pýtın jaǵdaıdy baǵa­­laýda óte úlken qatelik ji­ber­di. Bizdiń oıy­­myzsha, Pýtın­niń keńes­shileri qazir oǵan shyndyqty aıtýdan qorqady», dedi D.Flemıng.

Ýkraına prezıdenti Volodı­mır Zelenskıı álem elderine arnaǵan beıneúndeýlerin jal­ǵastyrdy. Bul joly Ýkraına basshysy Nıderland parlamentinde sóz sóılep, qarý-jaraq berýdi jáne eldi qalpyna keltirýge kómektesýdi surady. V.Zelenskıı Reseıge qatysty búkil iskerlik baılanys pen saýda-sattyqty toqtatýǵa, sanksııalardy qatań­datýǵa shaqyrdy.

Sondaı-aq ol Aýstralııa par­la­mentshileri men senator­lary­na beıneúndeý jarııalap, Ýkraı­na álem­dik qoǵamdastyqtyń qol­daýy­na senetinin, Reseıge qarsy so­ǵysta jeńilmeıtinin málimdedi.

Ýkraına Prezıdenti aýstra­lııalyqtardan Bushmaster brone­transporterlerin jiberýdi surady. Bir qyzyǵy, dál sol kúni Aýs­tralııa Reseı men Belarýs­ten keletin kez kelgen taýarlarǵa qosymsha 35 paıyz baj salyǵyn engizetinin habarlady.

Ulybrıtanııa Qorǵanys mı­nıstr­ligi Reseı Chernıgov oblysynda áskerı belsendilikti azaı­tamyz dep málimdegenine qa­ra­mas­tan, bombalaýdy jalǵas­tyryp jatqanyn málimdedi.

Keıbir bólimshelerdi shyǵar­ǵanymen reseılik áskerı­ler Kıevtiń shyǵysy men baty­syndaǵy pozısııalaryn áli de ustap tur. Ulybrıtanııa tarapy jaqyn kúnderi qalanyń shetinde aýyr shaıqastar bastalady dep esepteıdi. Reseı armııasynyń bas­ty nysanasyna aınalǵan Ma­rıý­polde aýyr shaıqastar júrip jatyr. Ýkraın áskeri qala orta­ly­ǵyn áli de baqylaýynda ustap otyr.

AQSh tarapy ótken aptada Reseı Chernobyldegi sarbazdaryn áketip jatqanyn habarlaǵan. Keıinnen buqaralyq aqparat qural­darynda olardyń sáýle aýrýyna shaldyǵyp, aýrýhanaǵa jat­qyzylǵany aıtyldy. Bul málimetti ázirge naqty tekserý múmkin emes.

Reıter agenttiginiń tarat­qan málimetterine qaraǵanda, reseı­lik jaýyngerler qorǵanys quraldarynsyz radıoaktıv­ti «Qyzyl orman» dep atalatyn jerden brondy kólikteri­men ótken, sóıtip ýly shań kóterilgen.