Bıyl elorda ákimdigi pedagogıkalyq jáne medısınalyq mamandyqtar boıynsha joǵary bilim alýǵa 1300 grant bóledi. Bul týraly Nur-Sultan qalasynyń ákimi Altaı Kólginov habarlady, dep jazady Egemen.kz.
«Ákimdik apta saıyn turaqty túrde azamattardy qabyldap turady. Aýdandarymyz ben eldi mekenderimizdi aralap, turǵyndarmen kezdesemiz. Osyǵan deıin aıtqanymdaı, qala turǵyndarynan kelip túsetin negizgi suraqtardyń biri – turǵyn úı máselesi. Memleket basshysynyń tapsyrmasyna sáıkes áleýmettik páterlerdi salý kólemi edáýir artty. Turǵyn úı baǵdarlamalaryna qatysýshylar sanaty keńeıtildi, jastarǵa arnalǵan arnaıy turǵyn úı dep baǵdarlamasy engizildi, turǵyn úı sertıfıkatynyń somasy ulǵaıdy jáne taǵy basqalary bar», dep jazdy elorda ákimi óziniń Instagram paraqshasynda.
Sonymen qatar, elorda basshysy joǵary bilim alý qoljetimdiligi erekshe nazarǵa alynǵan máselelerdiń biri ekenine toqtaldy.
«Alda kele jatqan jańa oqý jylynda pedagogıkalyq jáne medısınalyq mamandyqtar boıynsha joǵary bilim alýǵa jalpy sany 1300 grant bólýdi josparlap otyrmyz. Al oqýyn támamdaǵannan keıin olardy jumysqa ornalastyrý máselesimen aınalysamyz. О́zderińiz biletindeı, Memleket basshysy ustazdar men medısına qyzmetkerlerine jaǵdaı jasaýǵa jáne olarǵa qoldaý kórsetýge erekshe kóńil bóledi: jalaqy mólsheri artyp keledi, biliktilikti arttyrý baǵdarlamalary engizilip jatyr, medısınalyq jáne bilim berý ortalyqtarynyń jelisi keńeıýde», dep tolyqtyrdy Altaı Kólginov.