Qostanaıda turatyn kópbalaly otbasynda onynshy náreste dúnıege keldi. Balany perzenthanadan shyǵaratyn kúni qundaqtaýly sábıin qushaqtaǵan batyr ana Quralaı Ospanovany otaǵasy Atymtaı bastaǵan jaqyn týystary men dombyra, syrnaılaryn kótere kelgen óńir ónerpazdary perzenthananyń aldynan ándetip-dýmandatyp kútip aldy.
Sol kúni Ospanovtardyń úıine kórimdik, tartý-taralǵysyn kóterip, quttyqtaı barǵan oblystyq meshittiń naıb-ımamy Baqytjan qajy Ikram sábıdiń qulaǵyna azan shaqyryp Álıhan dep at qoıyp, aq batasyn berdi.
On balanyń ákesi Atymtaıdyń ózi qaladaǵy saýda úıleriniń birinde qarapaıym kúzetshi bolyp jumys isteıdi.
– Segiz qyzym bar. Segiz qyzdan keıingi ulymnyń esimi – Ahmet. Endi, mine, kelinshegim 42 jasynda mańdaıy torsyqtaı taǵy bir uldy dúnıege ákelip, qýanyshty bolyp jatyrmyz. Ár balanyń óz nesibesi bar, kenje ulǵa Álıhan dep azan shaqyrtyp at qoıdyq. Alash arystarynyń arýaǵy jebep júrsin degen nıet qoı. Balalarymnyń aldy bıyl 21-ge aıaq basty. Úlken qyzym Nurbaıan kolledjdi úzdik bitirip, qazir shetel tili mamandyǵy boıynsha joǵary oqý ornynda bilim alyp jatyr. Balalarymnyń bári Ǵafý Qaıyrbekov atyndaǵy №9 qazaq mektebinde oqıdy, – deıdi kópbalaly áke.
Búginde Ospanovtar otbasy úıelmeli-súıelmeli on balamen tórt bólmeli eski úıde turyp jatyr. Tórt bólmeli degen aty bolmasa, aýdany 50 sharshy metrden sál asatyn qýyqtaı ǵana tar úı. Anaý jyldary Atymtaı ákimdikke baryp, úıin keńeıtýge kómektesýdi suraǵan eken, biraq burynǵy ákimderdiń eshqaısysy qol ushyn sozatyndaı yńǵaı tanyta qoımapty.
– Odan keıin de ákimdikke baryp, úıimniń tar ekenin aıttym. Olar basyńda páteriń bar ǵoı, bizde úıdi keńeıtý degen qarastyrylmaǵan dep shyǵaryp saldy. Táýbe, memleket kópbalaly otbasylarǵa qoldaýyn aıap jatqan joq. Ataýly áleýmettik kómek, bala sanyna qaraı beriletin járdemaqynyń da sharapatyn kórip otyrmyz. Biraq bir áttegen-aıy – úıimizdiń tarlyǵy janǵa batady. Endi kenjemniń kýáligi qolǵa tıgen soń, ákimdikke taǵy baryp kóreıin degen oı bar. Tegin úı ber dep jatqan joqpyz, tek myna eski úıdiń baǵasyn shyǵaryp, ony bastapqy jarna retinde eseptep, ornyna keńirek úı berse, nur ústine nur bolar edi, – dedi Atymtaı Ospanov.
QOSTANAI