Atyraý oblysynyń sharýalaryn jylqynyń qyrylyp jatqany alańdatyp otyr. Máselen, Isataı aýdanynda 17, Qurmanǵazy aýdanynda 9 jylqy ólgen. Oblystyq aýyl sharýashylyǵy basqarmasynyń basshysy Amangeldi Salamattyń aıtýynsha, birneshe jylqynyń neden ólgeni ázirge anyqtalmaǵan.
– Jylqynyń ólý sebebin anyqtaý úshin 25 naýryzda jergilikti veterınarlar synama alyp, Ulttyq veterınarııalyq referenttik ortalyqqa tapsyrdy. Atalǵan ortalyq mamandary ólgen jylqyda ınfeksııalyq juqpaly aýrýlar qataryna jatatyn anemııa men rınopnevmonııanyń belgisi bolmaǵanyn anyqtady. Alaıda veterınarııa mamandary ólgen jylqydan parazıttik aýrý belgilerine uqsas jaǵdaıdy baıqaǵan. Sondyqtan oblystyq veterınarııalyq zerthanaǵa parazıttik aýrýdy anyqtaý úshin synama tapsyryldy, – deıdi A.Salamat.
Onyń aıtýynsha, birneshe turǵynnyń aýyrǵan malyna jergilikti veterınarlar emdeý jumystaryn júrgizýdi qolǵa alǵan. Oblystyq ákimdiktiń shaqyrýymen Qazaq veterınarııalyq ǵylymı-zertteý ınstıtýty men Bıologııalyq qaýipsizdik problemalary ǵylymı-zertteý ınstıtýtynyń mamandary keldi.
Aýyl sharýashylyǵy mınıstrliginiń málimetine súıensek, 29 naýryzda alynǵan zertteý nátıjesi janýarlarda juqpaly aýrý joq ekenin kórsetken. Qyzylqoǵa aýdanyndaǵy «Oıtań» sharýa qojalyǵyndaǵy qoı men iri qara maldy azyqtandyrý jáne tamaqtandyrý sharýashylyǵy tehnologııasyn buzý saldarynan ólgeni anyqtalǵan. Sonymen qatar Mahambet aýdanynyń «Mýtıev G.D.» sharýa qojalyǵy men Qurmanǵazy aýdanynyń turǵyny Samat Elemesovtiń malynyń qyrylý deregi boıynsha epızootologııalyq tekserý júrgizilip jatyr.
Atyraý oblysy