Jýyrda «Astana Balet» sahnasynda qazirgi zaman bıiniń daýylpazy Irjı Kılıannyń Stıven Raıh mýzykasyna qoıǵan «Joldan taıǵandar» horeografııalyq mınıatıýrasynyń premerasy ótti. Qoıýshy-horeograf – Stefan Jeromskı. О́ner ujymy Kılıannyń dańqyn álemge jaıǵan aq-qara tústi balet ishindegi tanymal týyndysyn sahnalady.
Aıta keteıik, bul – teatrdyń bıylǵy alǵashqy premerasy. Teatr dırektorynyń aıtýynsha, álemniń áıgili teatrlary cheh fılosof-horeografynyń baletin repertýaryna qosýǵa asyq. «Kılıan týyndysynyń repertýarymyzǵa engeni biz úshin zor qurmetpen qatar, orasan jaýapkershilik ári balet trýppasynyń kásibı sheberligin moıyndaýdyń belgisi. Onyń óner týyndylary ınternasınaldy ári ózektiligin joımaǵan, zamanaýı dúnıeler», dedi Aleksandr Sovostıanov.
«Joldan taıǵandar» týyndysynda, daýylpaz soqqysymen sahnaǵa atyp shyqqan bıshiler osy yrǵaqtyń áserimen qımyldap, kórermen qaýymdy uıytyp áketedi. Daýylpazdyń ár soqqysy – ishki ımpýls ispetti. Daýylpazdyń san soqqysynyń ishinen bir yrǵaqty tapqandaı kóringende, ol úzilip ketip, basqa áýen bastalady.
«Ataqty horeograftyń assıstenti Stefan Jeromskıdiń jetekshiligimen teatr ártisteri qysqa merzim ishinde ózindik «kılıan stılin» meńgerip aldy. Ol klassıkalyq sheńberden tys shyǵyp, bizdiń ártister úshin úırenshikti bıdiń formasynan asyp túsken. Bıshiler kúrdeli horeografııany meńgerip qana qoıǵan joq, ózderiniń derbes kelbetin de saqtaı aldy», deıdi teatrdyń kórkemdik jetekshisi Nurlan Kanetov.
Al Stefan Jeromskı bul balet áıel tabıǵatyn jan-jaqty zertteıdi dep sanaıdy. «Olardyń áreketin boljaý qıyn, minezderi san-qıly, ishki bolmysy da túrli. Bul qoıylym derbestik týraly. Sebebi «joldan taıǵan» perishte ne istese de óz erki. Olar áldebireýlerdiń suranysyn, olardyń qalaýyn oryndaýǵa, soǵan sáıkes bolýǵa mindetti emes. Menińshe, kórermen qaýym da bıshilerdi ózge qyrynan tanyp, kórgenine, osy arqyly qoıylymdy da baǵalaı alǵanyna ishteı qýanyp otyrdy», dedi ol.
Aıta keteıik, is-shara Mádenıet jáne sport mınıstrliginiń qoldaýymen júzege asyryldy.