Saryarqanyń saıyn dalasyna salynǵan astanamyzdyń aýa raıyn jaqtyrmaıtyn jandar jeterlik. Biri qańtary qarly, aqpany aıazdy dese, endi biri kóktemi kelip bolmaıtyn sýyq mekenge teńep jatady.
Syrtymyzdan synaǵandardy estigende, Jaratqannan jalbarynyp surap alǵan jalǵyz uldaı jan-jaǵynan qorǵashtaýǵa tyrysasyń. Al keıde bir memlekettiń astanasy degen dardaı dańqy bolǵan soń, keleńsizdikter men kemshilikterge jol bermese eken dep keııtinimiz belgili. Qys kelse, qar basyp, kóktem kelse, batpaq pen sýǵa belshesinen batatyn qala turǵyndarynyń qapalanatyndaı jóni bar. Jýyrda sol jaǵalaýda ornalasqan Binom Turan mektebine kireberis joldardaǵy kórinister sózimizdiń dáleli bolsa kerek. Áleýmettik jelilerdegi beınelerden áýrege túsken ata-ana men oqýshyny kórýge bolady. Baltyrynan balshyqqa batqan balalardyń bilimge degen qushtarlyǵy tómendemeı me?!
Úıinen úkilep jibergen perzentiniń laı keship, las bolyp kelgeni qaı ata-anaǵa unaıdy deısiz? Áleýmettik jelide Álııa esimdi ata-ana atalǵan oqý ordasyna degen aryz-shaǵymyn bylaı dep jetkizedi.
«Mektepke baratyn jol máselesin tez arada sheshýdi talap etemiz. Balalar batpaqtyń ústine qulap jatyr. Barý da, kelý de múmkin emes. Nege tezirek sheshpeısizder?! Bala mynadaı jolmen mektepke jetkenshe oqýǵa degen yntasy qashyp ketedi nemese jol jóndelip, jer kepkenshe onlaın rejimge kóshirińizder», deıdi ol.
Joǵarydaǵy jaıtqa baılanysty mektep ákimshiligimen sóıleskenimizde: «Biz mekteptiń ishki jumysyna ǵana jaýap beremiz», dep qysqa qaıyrdy.
Mektepten jaqyn mańdaǵy aıaldamaǵa deıingi qashyqtyq – bir shaqyrymdaı. Osynyń bárinde oqýshylar men olardyń ata-analary aıaq astyndaǵy sazdy ılep, úlken shalshyqtardyń ústinen sekirýge májbúr. Kólikpen keletinder úshin de ońaı emes. Biraq kıimińdi kirletip jaıaý júrgennen kólikpen kelgen anaǵurlym ońaıǵa túseri anyq. Deıturǵanmen, eldiń bárinde temir tulpar bar dep aıta almaısyz.
Taǵy bir jaıt, bıylǵy oqý jylynda birden úsh BINOM School alǵashqy oqýshylaryn qabyldady. Olar – Nova City shaǵyn aýdanynda, Baıtursynov kóshesi aýdanynda (SARYARQA) jáne Jaǵalaý shaǵyn aýdanynda (TURAN). Jobany BI Group ınnovasııalyq qurylys holdıngi jergilikti atqarýshy organdarmen birlesip, memleket-jekeshelik áriptestigi (MJÁ) qaǵıdaty boıynsha iske asyrýda. Joǵarydaǵy kóterilgen másele boıynsha kompanııa mamandaryna habarlastyq.
«Binom Turan mektebine kireberis joldarǵa qatysty aıtar bolsaq, MJÁ sharty boıynsha BI Group kompanııasy mektep pen alańishilik jelilerdi salýdy júzege asyrdy. Oqý orny aýmaǵynan tys obektige ınjenerlik kommýnıkasııalar men kirme joldardy salý jáne paıdalaný memlekettik seriktestiń mindettemelerine kiredi. Osy másele boıynsha qosymsha aqparat alý úshin siz Nur-Sultan qalasynyń ákimdigine júgine alasyz», dedi kompanııa ókilderi.
«Nur-Sultan qalasynyń Kólik jáne jol-kólik ınfraqurylymyn damytý basqarmasynyń málimetinshe, osy jyly kireberis joldardy asfaltbeton jabynymen qamtamasyz etý, abattandyrý jáne kóshelerdi jaryqtandyrý boıynsha qurylys-montaj jumystaryn júrgizý josparlanýda.
«Áleýmettik nysandarǵa kireberis joldardy salý» jobasyn júzege asyrýda. Bul – E17, E20, E33, E45 kósheleriniń qurylysy (Jaǵalaý aýdany, Binom bilim berý mekemesi). 2021 jyly sýmen jabdyqtaý, sharýashylyq-turmystyq jáne jańbyr kárizderiniń ınjenerlik jelilerin ornatý jáne qamtamasyz etý jumystary júrgizildi. Osy jyly joba aıasynda kireberis joldardy asfaltbeton jabynymen qamtamasyz etý, abattandyrý jáne kóshelerdi jaryqtandyrý boıynsha qurylys-montaj jumystaryn júrgizý josparlanýda. Sondaı-aq kólikterdiń qaýipsiz qozǵalysyn jáne kólikterdiń kedergisiz ótýin qamtamasyz etý maqsatynda jaqyn arada jol bóligin ýaqytsha ınertti materıalmen toltyrý jumystary júrgiziledi», dedi atalǵan basqarma ókilderi.
Azamattardyń aryz-shaǵymynyń nátıjesinde Jaǵalaý aýdanyndaǵy Binom mektebine ýaqytsha jaıaý júrginshiler joly tóseldi. Alaıda City Transportation Systems JShS baspasóz qyzmeti mektepke baratyn joldyń qanaǵattanarlyqsyz jaǵdaıyna baılanysty №7, 61 avtobýstar «Binom» mektebine ýaqytsha qatynamaıtynyn, «Jaǵalaý-4» aıaldamasynan keri burylatynyn aıtty.
Qalaı bolǵanda da, balalardyń alańsyz bilim alýy úshin osyndaı olqylyqtarǵa jol berilmegeni jón. «Aýyryp em izdegenshe, aýyrmaıtyn jol izdesek» bolmaı ma?! Buryn «Bilim ınemen qudyq qazǵandaı» deýshi edik, endi «Bilim baltyrdan balshyq keshkendeı» dep júrmeıik...