Parlament Senaty Qarjy jáne bıýdjet komıtetinde Ekonomıka jáne bıýdjettik josparlaý mınıstri Erbolat Dosaevpen kezdesý boldy. Onda Qazaqstandaǵy qazirgi kezdegi salyq jeńildikteriniń tıimdiligi týraly máseleler talqylandy.
Kezdesýdi asha kelip, komıtet tóraǵasy Rashıt Ahmetov ekonomıkany memlekettik retteýde salyq jeńildikteri mańyzdy qural ekenin jáne óndiristi damytýǵa, ony jetildirýge jáne qajetti ınfraqurylym nysandaryn jasaýǵa oń yqpal etetinin atap ótti. Onyń aıtýynsha, qazirgi kezde Qazaqstanda jalpy somasy 1 251,7 mıllıard teńge bolatyn 281 salyq jeńildikteri qarastyrylyp otyr. 2008 jylmen salystyrǵanda salyq jeńildikteriniń sany 65 paıyzǵa ulǵaıǵan.
«Osyǵan baılanysty Memleket basshysy «Qazaqstan-2050» Strategııasy – qalyptasqan memlekettiń jańa saıası baǵyty» atty Joldaýynda qoldanystaǵy barlyq salyq jeńildikterine revızııa jasaý jáne olardyń meılinshe tıimdi bolýy qajettigi týraly atap ótti», dedi senator.
Kezdesý barysynda senatorlar salyq jeńildikterin esepteý ádistemesi, olardyń berilýine monotorıng jasaý, salyq tóleýshilerdiń bosaǵan qarjy resýrstaryn óndiristi damytýǵa paıdalanýǵa kepildik júıesin zań júzinde bekitý qajettigi, qundy qaǵazdar naryǵyn salyq jeńildikterimen yntalandyrý jóninde ózekti saýaldar qoıdy.
E.Dosaev qazirgi kezde qoldanystaǵy salyq jeńildikteri boıynsha mekemede revızııa júrgizilip, taldaý jasalyp jatqany jáne onyń nátıjesi boıynsha Salyq kodeksine ózgerister engizý jóninde usynystar ázirlenetini týraly habarlady. Soǵan sáıkes, zań jobasy bıylǵy qyrkúıek aıynda Parlamentke usynylatyn bolady, dep habarlady Senattyń baspasóz qyzmeti.