Álemdegi eń bedeldi uıym – UFC-de óner kórsetip júrgen Shavqat Rahmonov jartylaı orta salmaqtaǵy úzdikter tiziminde toǵyzynshy orynda turǵan AQSh-tyń beldi sportshysy Nıl Megnıdi jekpe-jekke shaqyrdy. О́ziniń bul málimdemesin ol Tvıtterde jarııalady.
27 jastaǵy Shavqat Reseıdiń M-1 Global uıymynyń chempıondyq belbeýin ıelengennen keıin 2020 jyly UFC-ge aýysty. Sol kezden beri qandasymyz úsh ret oktagonǵa shyǵyp, barlyq básekede aıqyn basymdyq tanytty. Atap aıtsaq, brazılııalyq Aleks Olıveıra men Mıshel Prazerısti «qylǵyndyrý» ádisimen jeńdi. Gaıananyń ókili Karlston Harrısty aınalyp kelip teýip, eseńgiretip tastady. Jerge jyǵyp alyp, bas kótertpeı tómpeshtegennen keıin tóreshi jekpe-jekti toqtatýǵa májbúr boldy. Osy jeńisteriniń arqasynda Rahmonov UFC reıtınginde 15-orynǵa kóterildi. Qazirgi kezde bul – Qazaqstannyń sportshylary arasyndaǵy eń úzdik kórsetkish.
Nıl Megnı 1987 jyldyń 3 tamyzynda Nıý-Iorktiń Brýklın aýdanynda dúnıege keldi. Ol kıkboks pen brazılııalyq djıý-djıtsýdy jetik meńgergen. 2010 jyldan beri aralas jekpe-jekke den qoıdy. Arada úsh jyl ótkende Nıl UFC-diń qyraǵy mamandarynyń nazaryna ilikti. Barlyǵy 34 ret jekpe-jekke shyqqan amerıkalyq sportshy 26 márte jeńis toıyn toılady. 10 básekeni merziminen buryn aıaqtady. Sońǵy eki jyl aralyǵynda Megnı alty kezdesý ótkizdi. Bul rette AQSh-tyń ókili Maıkl Kezaǵa ese jiberse, Lı Szınlıan, Tonı Martın, Robbı Loýler, Djeff Nıl jáne Maks Grıffındi jeńdi.
Eger eki tarap ortaq mámilege kelse, qazaq sportshysynyń atalǵan uıymnyń reıtınginde alǵa órleýine tamasha múmkindik týyndaıtyny sózsiz. О́ıtkeni Nıl Megnıdiń UFC-de ózindik bedeli bar. Jáne de ol reıtıngte jerlesimizden birneshe saty joǵary tur. Al Shavqat Rahmonov sondaı saqa sportshyny san soqtyra alsa, onda chempıondyq tuǵyrǵa da bir qadam jaqyndaı túsedi.