«Janyńda júr jaqsy adam» demekshi, bizdiń qoǵamda tynymsyz eńbegimen, úlgili tárbıesimen óz ortasyna syıly bolyp, elimizge adal qyzmet jasap júrgen zamandastarymyz az emes. Sondaı jannyń biri – jas urpaqtyń sanasyna bilim nárin bergen, janyna shýaq syılap júrgen ustaz Gúljaýhar Bolatova.
Ol Kókshetaý óńirinde dúnıege kelgen. Jasynan asyl ájesiniń tárbıesin alyp, qazaq tiliniń qaınar bulaǵynan sýsyndap ósken. Qazaq memlekettik ýnıversıtetiniń fılologııa fakýltetin úzdik dıplommen támamdaǵan.
Ustazdyq joldy qalaı tańdaǵany týraly Gúljaýhardyń ózi: «Ol kezde ustazǵa degen kózqaras óte jaqsy boldy, ustaz – mártebeli mamandyq. Otbasymyzdyń da ustazǵa degen qurmeti erekshe edi. Bala kezimizde ata-anamyz ózimizge sabaq beretin ustazdarymyzdy ylǵı úlgi etip otyratyn. Oıyn oınaǵanda da ustaz bolyp oınaýǵa úıir edik. Onyń ber jaǵynda keńestik kezeńde ustazdyq etýde biliktiligin tanytyp, bıik belesterge kóterilgen birtalaı azamattardy kórip óskendikten, ustaz bolyp, bala oqytý meniń armanyma aınaldy», deıdi.
Eńbek jolyn 1983 jyly mektepte muǵalim bolýdan bastaǵan. 1989 jyly aspırantýraǵa qabyldanǵanǵa deıin Sh.Ýálıhanov atyndaǵy Kókshetaý pedınstıtýtynyń oqytýshysy bolyp qyzmet istedi. 1992 jyly jeltoqsan aıynda aspırantýrany bitirgennen keıin Qazaq memlekettik sáýlet-qurylys akademııasynda qazaq tili kafedrasynyń aǵa oqytýshy, sońynan dosent bolǵan. 1997 jyldan beri Astana qalasyndaǵy L.N.Gýmılev atyndaǵy Eýrazııa ulttyq ýnıversıtetinde bolashaq jýrnalısterge dáris beredi. 2011 jyldyń 20 maýsymynan Jýrnalıstıka jáne saıasattaný fakýlteti dekanynyń stýdenttermen jumys jónindegi orynbasary qyzmetin atqaryp keledi.
Fılologııa ǵylymdarynyń kandıdaty, dosent G.J.Bolatova – birneshe ǵylymı, oqý-ádistemelik eńbekterdiń avtory. Sonyń ishinde «Salt-jyrlaryndaǵy tárbıelik úrdister» (Sıpattama jáne ádebı úlgiler), «Barlyq mamandyqtaǵy stýdentterge arnalǵan qazaq tilinen baqylaý jumysy», «Otandyq jýrnalıstıka tarıhy» kýrsy boıynsha oqý baǵdarlamasy, «Din jáne onyń baspasózdegi kórinisi» arnaýly kýrsy boıynsha oqý baǵdarlamasy, «Soǵys jyldaryndaǵy merzimdi baspasózdegi «Otandy qorǵaýda» gazetiniń orny», «Aıqap» jýrnalynda ádebı materıaldardyń berilýi», «Qazaq jaýyngerlerin otansúıgishtik rýhynda tárbıeleýde maıdandyq basylymdardyń róli» sııaqty negizgi ǵylymı eńbekterin atap ótkenimiz jón.
Ustazǵa «Qazir talap joǵary, básekelestik kúshti. Osy oraıda, HHI ǵasyrdyń jýrnalısterin qalyptastyrýdyń joldary qandaı?» degen saýal qoıǵanymyzda, ol jýrnalıstıka mamandyǵyna kezdeısoq adamdar oqýǵa túse almaıtynyn, boıynda tabıǵı daryny bolmasa, neshe jerden oqytsa da, ol adamnan jýrnalıst shyqpaıtynyn jetkizdi.
Ustazdyń aıtýynsha, bilikti basshy Erlan Sydyqov basqaryp otyrǵan L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetinde bolashaq mamandar daıarlaý úshin barlyq jaǵdaı jasalǵan. Olardy joǵary bilikti mamandar bilim nárimen sýsyndatýda. Búginde stýdentterge mamandyqtyń qyr-syryn úıretý úshin BAQ-tyń basshylary, kásibı mamandary tartylǵan.
«Bul oraıda, álem jýrnalıstıkasy tek jahandyq jańalyqtardy halyqqa jetkizýden ǵana turmaıtyny anyq. Ekonomıkalyq damý jaǵynan áldeqaıda ozyp ketken álem elderiniń qataryna qosylý – Elbasymyz N.Nazarbaevtyń alǵa qoıǵan maqsaty ótken jylǵy jáne bıylǵy dástúrli joldaýlarynda barynsha aıqyn kórinis tapty. Árıne, jýrnalıstıkanyń da kóteretin júgi aýqymdy ekeni túsinikti. Fakýltet dekany Qaırat Saqtyń bastamasymen halyqaralyq deńgeıde belgili ǵalymdar shaqyryp, semınar, trenıngter ótkizip jatyrmyz», deıdi Gúljaýhar Jambylqyzy.
Ustaz ózi tárbıelegen shákirtteriniń boıynda eń asyl qasıetterdiń bolǵanyn qalaıdy. Olar joǵary oqý ornyn bitirgende daıyn maman bolyp shyǵýlary kerek. Osy jolda shákirtter ýaqyttaryn bosqa joǵaltpaı, berilgen múmkindikti tıimdi paıdalanyp, ózin jan-jaqty damyǵan túlek retinde tanytýǵa kúsh salýlary kerek. «Oǵan bizdiń bilim ordamyzda barlyq jaǵdaı jasalǵan. Qaı qoǵam bolmasyn, óz isiniń sheberi ǵana emes, sondaı-aq salt-dástúrin, tilin qurmetteıtin, dosqa adal, izetti, ıbaly, adamgershiligi mol, úlkenderdi syılaıtyn, mádenıetti, rýhanı jaǵynan tolysqan adamdardy qajet etetini sózsiz. Men de barlyq shákirtterimniń boıyna osy qasıetter darysa dep tileımin», deıdi G. Bolatova.
Aıbatyr SEITAQ,
jýrnalıst.
ASTANA.