Memleket basshysyna qańtar oqıǵasyn tergep-tekserý jumystarynyń barysy týraly baıandaldy, dep habarlaıdy Egemen.kz Aqordaǵa silteme jasap.
Sonymen qatar Prezıdentke shetelden aktıvterdi qaıtarý isi boıynsha qabyldanyp jatqan sharalar týraly málimet berildi. Rezonans týdyrǵan qylmystyq ister boıynsha fıgýranttardyń qylmystyq jolmen jınaǵan kapıtalynyń shyǵyp ketýin anyqtaý maqsatynda olardyń shetelge jylystatylýyna taldaý jasalýda.
Berik Asylov Qasym-Jomart Toqaevqa jýyrdaǵy Qazaqstan halqyna Joldaýynda bergen tapsyrmalarynyń júzege asyrylýy týraly aıtty. Atap aıtqanda, Bas prokýrordyń Konstıtýsııalyq Sotqa júginý quqyǵy týraly Konstıtýsııanyń 83-babyna engiziletin túzetýler daıyndalýda, sondaı-aq «Prokýratýra týraly» jańa Konstıtýsııalyq zań ázirleý bastaldy. Salalyq zańnyń basty basymdyǵy – azamattardyń konstıtýsııalyq quqyqtary men bostandyqtaryn qorǵaý.
Zań jobasyna Adam quqyqtary jónindegi ýákilmen, quqyq qorǵaýshylarmen jáne azamattyq qoǵammen ózara is-qımyl jasaý, prokýrorlardyń derbestigi men jaýapkershiligin arttyrý tetigi týraly erejelerdi engizý josparlanyp otyr.
Budan bólek, Prezıdentke azaptaýlardy tergep-tekserý boıynsha prokýrorlarǵa ókilettik berýge, otbasy-turmystyq zorlyq-zombylyqtar úshin jaýapkershilikti kúsheıtýge qatysty tapsyrmalardyń oryndalýy týraly aıtyldy.
Qasym-Jomart Toqaev qadaǵalaý organynyń halyqpen ózara yqpaldastyǵyn jandandyrýdyń mańyzdy ekenin atap ótip, Bas prokýrorǵa birqatar tapsyrma berdi.