Búgin, 5 sáýir kúni fýtboldan Qazaqstan chempıonatynyń premer-lıgasy 4-týrynyń oıyndary oınaldy. Osy alty oıynda qarsylastar bir-birleriniń qaqpalaryn alty ret qana nysanaǵa dál aldy. Bul týraly Egemen.kz habarlady.
Týr oıyndaryn Semeıde saǵat 15:00-de alańǵa shyqqan jergilikti «Spartak» jáne «Shahter» (Qaraǵandy) komandalary ashty. Qorytyndyda 1:0 esebimen aıaqtalǵan matchtyń taǵdyryn sheshken jalǵyz goldy 28-mınýtta qonaqtardyń qorǵaýshysy Nıkola Vasılevıch buryshtamadan berilgen dopty basymen urý arqyly saldy. Al birinshi taımnyń sońyna qaraı dóreki oıyny úshin «Shahterdiń» kelesi qorǵaýshysy – portýgal Iаgo Fernandes alańnan qýyldy. Arada birneshe mınýt ótkennen keıin oıynnyń bas tóreshisi Aleksandr Gaýzer semeılik jartylaı qorǵaýshy Baýyrjan Turysbekke de «qyzyl qaǵaz» kórsetti.
Budan bir saǵat keıin (16:00) bastalǵan úsh oıynnyń bireýinde ǵana gol soǵyldy. Jáne ol tabloda bir sanyn emes, úsh sıfryn kórsetip jandy. Shymkentte ótken bul kezdesýde «Ordabasy» Qostanaıdyń «Tobylyn» qabyldady. Alań ıeleri joǵaryda aıtylǵan úsh dopty da óz esepterine jazdy – 3:0! Oıyndaǵy esepti Abdýlla Dıakate 31-mınýtta ashty. Al kelesi taım shabýylshy Edın Iýnýzovıch úshin juldyzy týǵan mezet boldy. Ol meımandar darbazasyna 69 jáne 83-mınýttarda eki dop salyp úlgerdi.
Aıtqandaı, shymkenttikterdi bul matchqa jańa bas jattyqtyrýshy – lıtvan mamany Saýlıýs Shırmıalıs birinshi ret bastap shyqty. Onyń komandadaǵy debıýti osylaı tabysty aıaqtaldy. Osy ýaqyttarda oınalǵan kelesi eki kezdesý – «Atyraý» - «Aqtóbe», «Jetisý» (Taldyqorǵan) - «Ertis» (Pavlodar) aralaryndaǵy oıynda esep ashylǵan joq.
Budan keıin, saǵat 17:00-de bastalǵan eki oıyn da 1:0 esebimen aıaqtaldy. Olardyń birinde alań ıeleri basym tússe, ekinshisinde qonaqtardyń joly bolyp ketti. Astananyń «Astana» komandasy óz alańynda Tarazdyń «Tarazyn» qabyldap, jeńiske jetti. Munda alańǵa 63-mınýtta shyqqan Baýyrjan Jolshıev eki mınýttan keıin kózge tústi. Al ońtústik astananyń «Qaıraty» (sýrette) jeńisti Qyzylordada jergilikti «Qaısardan» oıyn bitýge 2 mınýt qalǵanda tartyp áketti. Goldy Aslan Darabaev túsirdi. Sóıtip, bıylǵy maýsymda almatylyqtar birinshi ret jeńiske jetse, qyzylordalyqtar ekinshi márte jeńiliske ushyrady.
Osy oıyndardan keıin «Astana» 10 upaımen top basyn jeke-dara bastady. Ekinshi orynda «Aqtóbe» kele jatsa, úshinshi belesten «Jetisý» kórindi. Budan ári jasaqtar mynadaı retpen ornalasty: 4.»Atyraý», 5. «Shahter», 6. «Ordabasy», 7. «Ertis», 8. «Qaısar», 9. «Tobyl», 10. «Qaırat», 11. «Spartak», 12. «Taraz». Kelesi týrdyń oıyndary 9 sáýir kúni oınalady.
Damır Qojamqul.
Derekkóz: Egemen.kz.
Foto: vesti.kz.