Taılandtyń Phýket qalasynda ótip jatqan bokstan halyqaralyq Thailand Open týrnıriniń shırek fınaldyq básekeleri óz máresine jetip, jartylaı fınalǵa shyqqan bylǵary qolǵap sheberleriniń esimi belgili boldy. Fınalǵa joldama beretin jekpe-jekterde Qazaqstan quramasynyń jeti boksshysy óner kórsetetin boldy. Al 81 kılodaǵy Nurbek Oralbaı fınalǵa tikeleı joldama aldy.
Jazǵy Azııa oıyndarynyń aldyndaǵy daıyndyq týrnıri sanalatyn Taılandtaǵy jarysqa Azııa, Afrıka jáne Eýropa qurlyqtarynyń 19 memleketinen boksshylar qatysyp jatyr. Bokstan Qazaqstan ulttyq quramasynyń bas bapkeri Qaırat Sátjanov bul jarysta elimizdiń negizgi quram ókilderi men jastar arasyndaǵy Azııa, álem birinshiliginiń chempıondarynan quralǵan jas boksshylardy synaqtan ótkizgendi jón kórgen eken.
Jarystyń alǵashqy aınalymyn sátti bastaǵan jerlesterimizdiń qatary shırek fınaldan keıin sıreı bastady. Taılandtaǵy týrnırge Qazaqstan quramasynan 11 boksshy attanǵan bolsa, sonyń tek segizi ǵana halyqaralyq dodanyń jartylaı fınalyna joldama aldy. О́kinishke qaraı, birneshe boksshymyz jerebege sáıkes alǵashqy kezdesýlerde bir-birine qarsylas atanyp, jarys jolynan shyǵyp qaldy. Tokıo Olımpıadasynyń qola júldegeri, álem chempıony Sáken Bıbosynov shırek fınalda kútpegen jerde sharshy alań ıesi Tanarat Saenfetten tóreshilerdiń aralas sheshimimen (27:30, 29:28, 28:29, 30:27, 28:29) jeńilip, týrnırdi erte aıaqtaýǵa májbúr boldy.
Jekpe-jekten soń Sáken Bıbosynov qazaqstandyq Bassport.kz saıtyna pikir bildirip, jeńilisiniń sebebin túsindirdi. «Bul – meniń álem chempıonatynan keıin qatysqan alǵashqy jarysym. Birinshi jekpe-jegimdi sátti ótkizgenimmen, ekinshi aıqasymda jergilikti boksshydan aılamdy asyra almadym. Qarsylasym taılandtyq boksshy bolǵan soń, tóreshiler oǵan kómektesti dep esepteımin. Men jeńilgen joqpyn, tóreshiler tarapynan azdap burmalaý boldy. Bul boksshymen byltyrǵy álem chempıonatynyń irikteý kezeńinde kezdesip, aıqyn basymdyqpen jeńgen bolatynmyn. Alaıda, bul – sport. Sport bolǵan soń jeńis pen jeńilis qatar júredi emes pe? Árbir jeńilisten qorytyndy shyǵaryp, kelesi jekpe-jekterge budan da myqty bolyp oralamyz. Bapkerlerim de barynsha qoldaý bildirip, ýaıymǵa salynbaýymdy surap jatyr. Álem chempıonatynan keıingi úzilis maǵan jaqsy áserin tıgizdi. Biraz tynyǵyp, jańa kúshpen oraldyq. Bıylǵy maýsymnyń basty básekesi – Qytaıda ótetin Jazǵy Azııa oıyndary. Sol básekede elimizdiń kók baıraǵyn bıikke kóterýdi maqsat ettim», dedi Sáken Bıbosynov.
Máskeý Olımpıadasynyń kúmis júldegeri Vıktor Demıanenko bul jekpe-jekte Bıbosynov jeńilgen joq dep esepteıdi. «Degenmen, aıqas sharshy alań ıesimen ótkennen keıin qazaqstandyq boksshy bir bas joǵary óner kórsetýi kerek edi», deıdi ol.
– Jekpe-jekti kórip shyqtym. Menińshe, eki boksshy da teń dárejede óner kórsetti. Soqqylar sany boıynsha Bıbosynov jeńilgen joq, degenmen bul jerde onyń rıng ıesimen judyryqtasqanyn eskerý kerek. Mundaı jaǵdaıda bir bas joǵary judyryqtasyp, tóreshilerge oılanatyndaı múmkindik qaldyrmaý kerek. Sarapshy maman retinde aıtar bolsam, Sáken jekpe-jek barysynda óte kóp artyq qımyl jasap, soqqylary kózdegen jerine jetpeı jatty. Ol qarsy soqqyǵa jumys isteýi kerek edi. Bul salmaqta nokaýtqa jiberetin soqqy sırek kezdesedi», deıdi V.Demıanenko.
Sáken Bıbosynovtan bólek, jastar arasyndaǵy álem chempıony Sanjar Táshkenbaı (52 kılo) men Tımýr Nurseıitov (75 kılo) te jarysty erte aıaqtady.
Al shırek fınalda qarsylastarynan basym túsken Serik Temirjanov (57 kılo), Sanatáli Tóltaev, Sultan Mýsınov (63,5 kılo), Aslanbek Shymbergenov (69 kılo), Aıatýlla Tákijanov (75 kılo) jáne Saǵyndyq Toǵambaı men Aıbek Oralbaı (91 kılo) jartylaı fınalǵa shyǵyp, kem degende qola medalǵa qol jetkizdi. Shırek fınalda Serik Temirjanov Sıngapýr ókili Mohamed Hanýrdın Bın Hamıdten 5:0 (30-24, 30-25, 30-25, 30-26, 30-24) esebimen basym tússe, 63,5 kılodaǵy Sanatáli Tóltaev Taıpeı boksshysy Chý-En Laıdi tóreshilerdiń aralas sheshimimen jeńdi. Al Sultan Mýsınov Vetnam boksshysy Vý Tandy nokaýtpen utty.
Bıyldan bastap ulttyq quramanyń kapıtany bolǵan Aslanbek Shymbergenov te alǵashqy jekpe-jeginde tehnıkalyq nokaýtpen jeńiske jetti. Ol shırek fınalda fılıppındik Marjon Pıanarmen kezdesip, birinshi raýndta eki ret nokdaýnǵa jiberdi. 75 kılodaǵy Aıatýlla Tákijanov jartylaı fınalǵa joldama berýshi kezdesýde jergilikti boksshy Borvorn Kadamnýanǵa esh múmkindik qaldyrmady. Tipti úshinshi raýndta Tákijanov qarsylasyn bir márte eseńgiretip aldy.
Aýyr salmaqtaǵy Saǵyndyq Toǵambaı men Aıbek Oralbaı Vetnam jáne Úndistan boksshylaryn qapy qaldyryp, jartylaı fınalǵa joldama aldy. Jerebe boıynsha jekpe-jekterin jartylaı fınaldan bastaǵan Nurbek Oralbaı birinshi aıqasynda Taıland boksshysy Anavat Tongkatokty tehnıkalyq nokaýtpen jeńip, qazaqstandyq boksshylar arasynan birinshi bolyp fınalǵa shyqty.
Aıta keteıik, jartylaı fınal jekpe-jekteri búginge, al fınal kezdesýleri erteńge josparlanǵan.