Qazaqstan-Polsha qarym-qatynasyna – 30 jyl

Aıtýly oqıǵaǵa oraı eki mem­lekettiń basshylary Qasym-Jomart Toqaev pen Andjeı Dýda, sondaı-aq Qazaq­stannyń Syrtqy ister mın­ıstri Muhtar Tileýberdi men Polshanyń Syrtqy ister mınıstri Zbıgnev Raý ózara quttyqtaý hattarmen almasty.

Nur-Sultan men Varsha­va­da mereıtoılyq kúnge oraı Qazaq­stan men Polsha­nyń syrt­qy ister mınıstrlik­te­rin­de resmı kezdesýler ótti. Qa­zaq­stan Syrtqy ister mınıstriniń oryn­basary Roman Vası­lenko Polsha elshisi Selım Haz­bıevıchti, al Polsha Syrtqy ister mınıstriniń orynbasary Mar­chın Pshıdach Qazaqstan elshisi Álim Qırabaevty qabyldady.

«Tarıhı turǵydan osyndaı qysqa merzim ishinde eki el arasyndaǵy áriptestik jyldan-jylǵa nyǵaıyp jáne jan-jaqty keńeıip, búginde bıik deńgeıge jetti. Buǵan ekijaqty jáne kópjaqty formattaǵy ózara qoldaýmen qatar, jahan­dyq syn-tegeýrinder aıasyn­da­ǵy kúrdeli sátterde kórinis tap­qan ózara kómek pen yntymaqtastyq dálel bolyp tabylady», dep atap ótti R.Vasılenko.

Qazaqstandyq dıplomat Ýkraınada áskerı is-qımyldar bastalǵannan beri Polsha Úkimetiniń Qazaqstan azamattaryn elge qaıtarý úshin kórsetken zor kómegine alǵys bildirdi. Atap aıtqanda, Polshanyń Ka­tovıse qalasyndaǵy áýeja­ıy­nan jeti evakýasııalyq reıs uıymdastyrylyp, jalpy al­ǵanda 700-den astam adam Qazaq­stanǵa oraldy.

Dıplomattar aldaǵy jyldary jan-jaqty yntymaqtastyq saıası, saýda-ekonomıkalyq jáne mádenı-gýmanıtarlyq sala­larda odan ári keńeıe bere­tinine senim bildirdi. Eki el arasynda joǵary jáne úkimettik deńgeıde turaqty baılanystar or­natylǵanyn, sondaı-aq par­la­mentaralyq dıalogtyń qar­qyndy damý serpinin atap ótti.

Taraptar saýda-ekono­mı­ka­­lyq jáne ınvestısııalyq baı­lanysqa erekshe toqtaldy. Pol­sha – Qazaqstannyń Eýro­pa­lyq odaq elderi arasyn­daǵy segizinshi eń iri saýda áriptesi. 2021 jyly eki el arasyndaǵy taýar aınalymy 760,4 mln dollar bolǵan, al 2005-2021 jyldar aralyǵynda Polshadan Qazaqstan ekonomıkasyna tartylǵan tikeleı ınvestısııalardyń kólemi 272,6 mln dollarǵa jetken.

Qazaqstan men Polsha arasynda energetıka, jasyl teh­no­logııa, kólik jáne logıs­­tıka, elektrondy saýda, qar­­jy teh­nologııalary, týrızm, agro­ónerkásiptik keshen sııaq­ty salalarda birlesken pers­pek­tıvalyq jobalardy damytýda áleýet bary aıtyldy.