Men Petropavl qalasyndaǵy №25 jalpy orta bilim beretin mekteptiń 11-synyp oqýshysymyn. О́tken jyly «Sabaqtastyq» salasynda telemarafonǵa qatysyp, osy dodada «Úzdik volonter» dep tanyldym.
Shyn júrekten jaqsylyq jasaýǵa umtylý – adamnyń boıyndaǵy eń asyl qasıetterdiń biri. Meıirimdilik te kez kelgen janǵa jylylyq pen shýaq syılaıtyny anyq.
2021 jyly óńirimizde «Birgemiz» tujyrymdamasy negizinde «Bilim», «Sabaqtastyq», «Saýlyq», «Taza álem», «Asyl mura», «Qamqor», «Úmit» sekildi uzyn sany jeti baǵytta jalpyulttyq eriktilerdiń jobalary júzege asyryldy. Bul jobalarǵa Petropavl qalasynyń jasóspirimderi de belsendi qatysyp, óz salalary boıynsha úlken jetistikterge jetti. Táýelsizdiktiń 30 jyldyǵyna oraı Soltústik Qazaqstan oblysynda «Asar» atty eriktilerdiń jıyny ótip, oblysymyzdyń eń úzdik eriktileri marapattarǵa ıe bolǵan edi. Osy jıynda maǵan «Sabaqtastyq» atty baǵytta «2021 jyldyń úzdik volonteri» ataǵyn alý buıyrdy. «Sabaqtastyqtyń» basty maqsaty – balalarǵa qatysty volonterlerdiń tálimgerlik tájirıbesin engizý. Sondyqtan men ózim oqıtyn orta mektepte tálimgerlik baǵytty ustanyp, «25 mektep shákirti» atty debat klýbyn ashqan bolatynmyn.
Ras, «Qazir boı jarystyratyn zaman emes, oı jarystyratyn zaman». Tereń bilimmen qarýlanǵan jas el erteńi úshin eleýli ister atqarary da aqıqat. Osyǵan oraı biz joba aıasynda oqýshylardy pikirsaıys álemimen tanystyryp, bul salaǵa degen qyzyǵýshylyqtaryn oıattyq. Mekteptiń qoldaýymen «Elbasy medali» jobasyndaǵy talant pen daǵdy baǵytyndaǵy kóshbasshylyq pen sheshendik ónerdi damytýym osy maqsatymdy júzege asyrýǵa septigin tıgizgeni de sózsiz. Qazirgi tańda pikirsaıysqa mekteptiń básekege qabiletti shákirtteri qatysyp, júldeli oryndar alyp júr.
Bul – meniń volonterlikpen shyn yqylaspen aınalysyp, bir jyl ishinde qol jetkizgen alǵashqy jetistigim. Alaıda aldaǵy ýaqytta da jan-jaǵymdaǵy adamdar men jastarǵa qolushyn sozýdy, qajet bolsa qaıyrymdylyqpen aınalysýdy oılap júrmin. Sebebi, volonter bolý – qaıyrymdy bolý degendi bildiredi emes pe?!
Ajar SYZDYQOVA,
11-synyp oqýshysy
Petropavl