Býrabaı kólderinde balyq aýlaýǵa onlaın daıyndalý tek osy jyly múmkin boldy. Buǵan deıin sporttyq (áýesqoı) balyq aýlaý erejelerine sáıkes balyqshylar tirkeýden qaǵaz júzinde ótýge mindettelgen bolatyn.
Balyqshylardyń kóptegen ótinishi boıynsha 2021 jyldyń mamyr aıynda «Býrabaı» ulttyq parkiniń qyzmetkerleri erejege ózgerister engizýge bastamashy boldy. Sodan keıin vedomstvolarda bekitýler bolyp, sybaılas jemqorlyqqa qarsy saraptamanyń qorytyndysyn alý, quqyqtyq aktilerdi paıdalanýshylardyń qoǵamdyq onlaın talqylaýyn ótkizý men saraptamalyq keńestiń qorytyndysyn alý qajet boldy. Muny birinshi bolyp Býrabaı ulttyq parkiniń qyzmetkerleri engizip, búginde olardyń tájirıbesine ózge ulttyq saıabaqtaǵy áriptester de qyzyǵýshylyq tanytýda.
Qorǵaljyn memlekettik qoryǵynyń tusaýkeser ortalyǵynda Orman sharýashylyǵy jáne janýarlar dúnıesi komıteti «Erekshe qorǵalatyn tabıǵı aýmaqtardyń sý qoımalarynda balyq jáne basqa da sý janýarlaryn sporttyq, áýesqoılyq jáne melıoratıvtik aýlaýdy retteý máseleleri» atty semınar uıymdastyrdy.
«Býrabaı» memlekettik ulttyq parkiniń bas ormanshysy Baýyrjan Mahmetov áriptesterin jańa trendpen tanystyrdy. Ol erejege engizilgen ózgeristerdi úılestirý algorıtmi, memlekettik organdarmen ózara is-qımyl týraly aıtty. Sondaı-aq ulttyq saıabaqtyń saıtynda balyq aýlaýǵa ruqsattardy elektrondy túrde rásimdeıtin platforma qalaı jumys isteıtinin kórsetti.
Ruqsat qaǵazyn onlaın satyp alý óte ońaı, parkburabay.kz saıtyndaǵy «Onlaın sporttyq balyq aýlaý» bólimine kirip, «Onlaın bılet satyp alý» siltemesindegi formany toltyrý qajet. Tólem jasaısyz da, balyq aýlaýǵa barasyz.