Elordada tártip saqshylary 88 jastaǵy zeınetkerge shabýyl jasaǵan qaraqshyny ustady, dep habarlaıdy Egemen.kz Nur-Sultan polısııa departamentiniń baspasóz qyzmetine silteme jasap.
Krımınaldyq polısııa qyzmetkerleri jedel-izdestirý is-sharalary barysynda qaraqshylyq shabýyl jasady degen kúdikti azamatty ustady.
«Túnde belgisiz er adam 88 jastaǵy qarııanyń esigin qaǵyp, ashýyn suraǵan. Qarııa esikti ashqan sátte er adam ony uryp, tonaı bastaǵan», dep habarlady polıseıler.
Qaraqshy qarııanyń altyn saqınasyn sheship alǵan jáne bólmeni muqııat qarap taǵy bir altyn saqına alyp shyqqan.Tergeý barysynda qaskúnemniń Zataevıch kóshesinde páter jaldaǵany anyqtaldy.
«Qarama-qarsy páterde jalǵyz adam turatynyn bilip, qasaqana barǵan. Elorda polıseıleri 28 jastaǵy kúdiktini ustady. Ol altyn buıymdardy lombardqa tapsyryp úlgergen. Buǵan deıin onyń urlyq úshin sottalǵany anyqtaldy», dep túsindirdi baspasóz qyzmeti.
Ustalǵan azamat Nur-Sultan qalalyq polısııasynyń ýaqytsha ustaý ızolıatoryna qamaldy.