Aqparat jáne qoǵamdyq damý mınıstri Asqar Omarovtyń tóraǵalyǵymen oblystar, Nur-Sultan, Almaty jáne Shymkent qalalary ákimdikteriniń qatysýymen aqparatqa qol jetkizý máseleleri jónindegi komıssııanyń otyrysy ótti.
Otyrysta Pavlodar jáne Jambyl oblystary ákimdikteri qyzmetiniń ashyqtyǵyn qamtamasyz etý máseleleri qaraldy. Jıyn barysynda mınıstr bıyl komıssııa jumysynda óńirlerde «Aqparatqa qol jetkizý týraly» zańdy saqtaýǵa basa nazar aýdarylatynyn atap ótti. Osy maqsatta komıssııa alańynda jyl boıy barlyq jergilikti atqarýshy organdar qaralmaq.
A.Omarov Jambyl jáne Pavlodar oblystarynyń ákimdikterine anyqtalǵan kemshilikter men buzýshylyqtardy joıý jáne boldyrmaý jónindegi 2022 jylǵa arnalǵan is-sharalar josparyn birlesip ázirleýdi jáne bekitýdi usyndy. Sonymen qatar mınıstr jıynǵa qatysýshylardyń nazaryn Prezıdenttiń 2022 jylǵy 7 sáýirdegi «Ortalyq atqarýshy organdar basshylarynyń halyqpen kezdesýlerin ótkizý týraly» Jarlyǵyna aýdardy. Bul qujatta mınıstrlerdiń óńirlerde halyqpen turaqty kezdesýler ótkizýi egjeı-tegjeı jazylǵan.
Kezdesýde baıandama jasaǵan Aqparat jáne qoǵamdyq damý vıse-mınıstri D.Qadyrov «Aqparatqa qol jetkizý týraly» zań talaptaryn jappaı jáne múltiksiz saqtaý qajettigin sóz etti.
Pavlodar jáne Jambyl oblystarynyń ákimdikteri úshin problemalardyń biri – resmı saıttaryndaǵy jáne «Ashyq úkimet» portalyndaǵy aqparattyń ýaqtyly jańartylmaýy. «Mysaly, azamattardy qabyldaý kestesi, baılanys derekteri, statıstıkalyq salalyq derekter, bos jer ýchaskeleriniń bolýy týraly aqparat, turǵyndar úshin mańyzdy derekter saıtta jańartylmaıdy», dep atap ótti D.Qadyrov.
О́ńirlerge tán taǵy bir másele – «Ashyq úkimet» portaldarynda aqparatty ornalastyrý tártibiniń saqtalmaýy, sondaı-aq NQA jobalary men bıýdjettik baǵdarlamalardy qoǵamnyń talqylaýy týraly habarlamalardyń bolmaýy. «Sonymen qatar NQA jobalaryna kelip túsken pikirler men usynystardyń edáýir bóligine «Nazarǵa alyndy» degen sııaqty formaldy jaýaptar beriledi», deıdi D.Qadyrov.
Budan bólek otyrysta aqparatqa qol jetkizý máseleleri boıynsha ýákiletti tulǵalardyń shala-pula atqarylǵan jumystary synǵa alyndy. Esterińizge sala keteıik, ótken jyldan bastap barlyq memlekettik organdarǵa ýákiletti tulǵalar ınstıtýty engizilgen bolatyn.
Jıynda Pavlodar jáne Jambyl oblystarynyń ákimdikterine áleýmettik jeliler men memlekettik organdardyń birinshi basshylarynyń blog platformasyn jandandyrý qajettiligi eskertildi. Mınıstrlik ókili sóziniń sońynda ashyq otyrystarǵa qoljetimdilikti qamtamasyz etýdiń, sondaı-aq BAQ úshin ashyqtyqtyń mańyzdylyǵyn atap ótti.