Búgin Mádenıet jáne sport mınıstri Dáýren Abaevtyń tóraǵalyǵymen Úkimet janyndaǵy Respýblıkalyq onomastıka komıssııasynyń otyrysy ótti, dep habarlaıdy Egemen.kz.
Komıssııa otyrysynda Shyǵys Qazaqstan, Qaraǵandy jáne Almaty oblystary ákimdikteriniń jańadan qurylǵan Abaı, Ulytaý jáne Jetisý oblystaryna ataýlar berý týraly usynystar qaraldy.
«Memleket basshysy Qazaqstan halqyna Joldaýynda birqatar ákimshilik-aýmaqtyq ózgeristi atap ótti. Olardyń barlyǵy tereń ekonomıkalyq negizdemege ıe. Biraq biz úshin eń bastysy - qoǵam pikirin eskerý. Endi Qazaqstanda jańa oblystar paıda bolady. Atap aıtqanda Semeı qalasy Jańa Abaı oblysynyń ortalyǵyna, Jezqazǵan jańadan qurylǵan Ulytaý oblysynyń ortalyǵyna aınalady, mundaı ózgerister Almaty oblysyna da qatysty», dedi Dáýren Abaev.
Kez kelgen qalany, eldi mekendi nemese kósheni qaıta ataý onomastıka salasyn retteıtin zańnama talaptaryna sáıkes júzege asyrylatynyn atap ótý qajet.
Komıssııa kelip túsken usynystardy qarap, qorytyndy shyǵarady. Keıinnen qaıta ataý týraly sheshim Prezıdent Jarlyǵymen bekitiledi.
«Otyrys qorytyndysy boıynsha komıssııa músheleri ákimdikterdiń usynysyn maquldady. Jaqyn arada komıssııanyń qorytyndysy daıyndalyp, zańnamaǵa sáıkes odan ári jumys isteý úshin oblystardyń ákimdikterine jiberiledi», dedi mınıstr.
Buǵan deıin Respýblıkalyq onomastıka komıssııasy Qapshaǵaı qalasyn Qonaev dep qaıta ataý týraly oń qorytyndy bergen bolatyn.