Túrkistannyń irgesindegi Kentaý qalasynyń turǵyndary kópten kútken másele sheshilip, qalaǵa gaz berildi. Qazirgi tańda kógildir otynmen qalanyń 18 200 abonenti qamtylady, dep habarlaıdy Egemen.kz.
Qalǵan turǵyndar kezeń-kezeńimen kúzge deıin qosylady.
Endi aldaǵy 2 jylda qalaǵa qarasty qalǵan 4 aýylǵa tabıǵı gaz tartylady dep kútilýde. Sondaı-aq Kentaý qalasyndaǵy «Turkistan» arnaıy ekonomıkalyq aımaqta ornalasqan «Túrkistan temirbeton» zaýyty óz jumysyn bastady. О́ndiris orny turǵyn úıge arnalǵan 10-ǵa jýyq túrli temirbeton ónimderin shyǵarady.
Aıta keteıik, ınvestısııanyń jalpy kólemi – 1,2 mlrd teńge, osy sátke deıin 700 mln teńge oryndalǵan. Jańa 60 jumys ornyn ashý josparlanǵan. Zaýytta jabyndylar, rıgel, úılerdiń irge tasyn qalaýǵa arnalǵan bloktar, baǵanalar, jol boıyna qoıylatyn bordıýrlar shyǵarylmaq. Zaýyttyń jobalyq qýattylyǵy – jylyna shamamen 80 myń sharshy metr temirbeton. Shıkizattyń basym bóligi Kentaý qalasynan alynady. Shyǵarylǵan ónimdermen Túrkistan oblysyn qamtý josparlanýda.
Jańa zaýyttyń jumysyna sáttilik tilegen oblys ákimi О́mirzaq Shókeev óndiristi damytý baǵytynda jumys kúsheıetinin aıtty. Sondaı-aq oblys ákimi Sh.Qaldaıaqov atyndaǵy mádenıet saraıynda turǵyndarmen kezdesti.
«Kentaý Túrkistanmen qatar damyp, áleýeti kóteriledi. Monoqalanyń básekege qabilettiligi joǵarylaıdy. Oǵan tolyq múmkindik bar. Jalpy oblys ortalyǵynyń Túrkistan qalasyna aýysýy Kentaýdyń damýyna úlken serpin berdi. Bul shahar men úshin óte ystyq. Máselelerin de jaqsy bilemin. Sondyqtan ony damytý – azamattyq paryzym. О́tken jyly Kentaý qalasyn damytýǵa 1,3 mlrd teńge qarjy bólindi. Kópqabatty úıler modernızasııalaýdan ótti. «Qyzylásker» avtomattandyrylǵan gaz stasııasyn iske qosý jumystary aıaqtalyp, qala turǵyndaryn tabıǵı gazǵa qosý múmkindigi paıda boldy. Shahtanyń sýyn tómendetý jumystary júrgizilýde. Bıyl qalany damytýǵa 1,6 mlrd teńge baǵyttalyp otyr. Kentaý qalasy aýmaǵyndaǵy áleýmettik-ınfraqurylymdyq máselelerdi júıeli túrde kezeńimen sheshetin bolamyz», dedi О́mirzaq Shókeev.
Kezdesýde turǵyndar ınfraqurylym, qalany gazben qamtý, onomastıka, jumys oryndaryn kóbeıtý, jol, baspanamen qamtý, balalar oıyn alańshalaryn salý, jastardy «Serpin» baǵdarlamasyna engizýge yqpal etý jáne ózge de máselelerdi kóterdi. О́mirzaq Shókeev turǵyndardyń ótinishteri men suraqtaryn tyńdap, zań aıasynda keńes berdi. Birqatar túıtkilderdi sheshý boıynsha jaýapty basqarma basshylary men Kentaý qalasynyń ákimi Rashıd Aıýpovqa mindetter júktedi.